4.7 Icifulo Ca Cilambu: Umulu Nangu Icalo?

Ukufumyako imilandu iyi pa mulu, onse u ucili aleumfwa ukuti umulu ukucila icalo ukaba e cifulo ca Bufumu bwakwa Lesa, ekutiila icilambu calailwe, alekabila kabili ukulondolola kwa kufumyapo ifishinka ifyalakonkapo:-

- 'Ipepo lyakwa Shikulu' lilomba Ubufumu bwakwa Lesa ukwisa (ekutiila ukupepela ukubwela kwakwa Kristu), lintu ukufwaya kwakwa Lesa kukacitwa pa calo ngafintu kwene kucitwa nomba mu mulu (Mateo 6:10). Eico ifwe tulapepela Ubufumu bwakwa Lesa ukwisa pa calo. Cene busanso icakuti cila bushiku amakana ya bantu bapepa amashiwi aya ukwabulo kutontonkanya ilyo kabili batetekela ukuti Ubufumu bwakwa Lesa bwalipampamikwa kale nomba mu mulu bwino bwino, no kuti icalo cikonaulwa.

- ''Balipaalwa abafuuka: pantu bene bakapyana icalo'' (Mateo 5:5) - tekuti '...pantu imyeo yabo ikaya ku mulu'. Ici cilesonta ku Amalumbo 37, uyu chapta onse akonkomesha ukuti icilambu ca balungami ica kupelekesha cikaba pa calo. Mu cifulo cimo cine fye umo ababifi basekelele ubukulu bwa nshita inono, abalungami bakalambulwa no mweo wa pee, no kukwata icalo ici cimo cine ico ababifi inshita imo bakwetepo amaka (Amalumbo 37:34,35). ''Abafuuka bakapyana icalo...Nga abapaalwa na wene bakapyana icalo... Abalungami bakapyana icalo, no kwikala mulya umuyayaya'' (Amalumbo 37:11,22,29). Ukwikala mu calo/icalo calailwe umuyayaya capilibula ukuti umweo wa pee mu mulu tacingacitika.

- ''Dabidi...alifwa no kushiikwa pamo...Dabidi tanina mu myulu'' (Imilimo 2:29,34). Mukupilibula, Petro alondolwele ukuti isubilo lyakwe lyali kubuuka ukufuma ku bafwa pa kubwela kwakwa Kristu (Imilimo 2:22-36).

- Icalo e cibansa ca milimo yakwa Lesa na bantu: ''Umulu, nangu fye imyulu, yakwa Yehoba, lelo icalo Wene apeela ku bana ba bantu'' (Amalumbo 115:16).

- Ukusokolola 5:9,10 kulanda icimonwa ca ifyo abalungami bakalanda ilyo bene bakapokelelwa pa cipuna ca bupingulo: ''(Kristu) alicita ifwe kuli Lesa wesu imfumu na bashimapepo: kabili ifwe tukateeka pa calo''. Icikope ici ica kuteeka mu Bufumu bwakwa Lesa pa calo cili icataluka sana ku matontonkanyo ya bufi ukuti ifwe tukasekelela 'ukutuusha' ku cifulo cimo mu mulu.

- Amasesemo yakwa Daniele chapta 2 na 7 yalangilila ukukonkana kwa maka ya kuteeka, uko mu kupelekesha kukesafumishiwapo ku Bufumu bwakwa Lesa pa kubwela kwakwa Kristu. Amaka ya Bufumu ubu yakaba ''pesamba lya mulu onse'', no kwisula ''icalo conse'' (Daniele 7:27; 2:35 pashanya vesi 44). Ubufumu ubu ubwa muyayaya ''bukapeelwa ku bantu ba bashiila ba Wapulamo'' (Daniele 7:27); eico icilambu cabo mweo wa pee mu Bufumu ubu ubukaba pa calo, pesamba lya myulu.