4.6 Ubupingulo

Ukusambilisha kwa Baibele palwa bupingulo kuli cimo pa fipoope fya ntanshi ifya citetekelo cimo, ifyo fifwile ukwilukwa bwino bwino intanshi ya lubatisho (Imilimo 24:25; Aba Hebere 6:2). Ilingi Amalembo yasosa palwa ''bushiku bwa bupingulo'' (pamo nga 2 Petro 2:9; 3:7; 1 Yohane 4:17; Yuda 6), inshita ilyo abo abapeelwa ukwishiba Lesa bakapokelela icilambu cabo. Abo bonse bafwile ''ukwiminina kuntanshi ya cipuna ca bupingulo icakwa Kristu'' (Abena Roma 14:10); ifwe ''kumoneka kuntanshi ya cipuna ca bupingulo icakwa Kristu'' (2 Abena Korinti 5:10) ku kupokelela icilambu pa myeo yesu mu musango wa mubili.

Ifimonwa fyakwa Daniele palwa kwisa kwa cibili kwakwa Kristu, fyalundilepo cimo ica ici cipuna ca bupingulo mu musango wa cipuna ca bufumu (Daniele 7:9-14). Imilumbe ileafwa ukulanga bwino amashiwi mu musango umo. Ulya uwa matalanta wapashanya wene ku kubwela kwakwa shikulu, uwaita ababomfi bakwe no kulolesha nga bene babomfya bwino ulupiya luntu wene ashile kuli bene (Mateo 25:14-29). Umulumbe wa balondo wapashanya ubwite bwa mbila nsuma ku busumbu bwe sabi, ukulonganya imisango yonse ya bantu; abaume elyo baikele panshi (pashanya ubupingulo ukwikala) no kwakanya isabi lisuma ukufuma ku libi (Mateo 13:47-49). Ukwilula kuli apabuuta: ''Pa mpela ye sonde bamalaika bakeesa, no kuputula ababifi ukufuma pakati ka balungama''.

Ukufuma kuli ifyo ifwe twamona ukufika apa, cene calinga ukulanda ukuti panuma ya kubwela kwakwa Shikulu no kubuuka kwa bafwa, kukaba ukulongana pamo kwa bonse abaitwa ku Mbila nsuma ku cifulo cimo pa nshita iyashininkishiwa, ilyo bene bakakumanya Kristu. Ukulubulula kuli no kupeelwa na bene, kabili wene akalangilila ngacakuti bene bakasuminishiwa ukupokelela icilambu ca kwingila mu Bufumu nangu iyo. Ni pa nshita fye iyi epo abalungami bakapokelela icilambu cabo. Ici conse caleetwa pamo no mulumbe wa mpanga ne mbushi: ''Umwana wa muntu akeesa mu bukata bwakwe, na bamalaika ba mushilo bonse pamo nankwe, elyo wene akeekala pa cipuna ca bufumu ca bukata bwakwe (icipuna ca bufumu cakwa Dabidi mu Yerusalemu, Luka 1:32,33): kabili kuntanshi yakwe kukalonganikwa inko shonse (ekutiila abantu ukufuma mu nko shonse, pashanya Mateo 28:19): kabili wene akapaatulula bene umo ukufuma kuli umbi, ngefyo umucemi alekanya impanga shakwe ukufuma ku mbushi. Kabili wene akabiika impanga ku kuboko kwakwe kwa kukulyo, lelo imbushi ku kuso. Elyo Imfumu ikalanda kuli bene abali ku kuboko kwaiko kwa kukulyo, Iseni, imwe abapaalwa bakwa Tata, pyaneni Ubufumu ubwapekanishiwa imwe'' (Mateo 25:31-34).

Ukupyana Ubufumu bwakwa Lesa, ukupokelela ifilayo kuli Abrahamu ukukuma kuli bwene, e cilambu ca balungami. Lelo ici cikaba fye panuma ya bupingulo, ico cikaba pa kubwela kwakwa Kristu. Eico cene tacingacitika ukupokelela icilambu calailwe ica mubili uushifwa intanshi Yesu talabwela; eico ifwe tuli no kusondwelela ukuti ukufuma pa nshita ya mfwa ukufika pa kubuuka kwa bafwa, uwatetekela takwete kwikala kwa kwishiba konse nakalya, pakumona ukuti cene tacingacitika ukwikala mu musango onse ukwabula ukukwata umubili.

Cene lisambilisho lya Baibele ilibwekeshiwapo ilyakuti ilyo Kristu akabwela, elyo icilambu cikapeelwa - kabili te pantanshi iyoo:-

- ''Ilyo Umucemi mukalamba (Yesu) akamoneka, imwe mukapokelela icilongwe ca bukata'' (1 Petro 5:4 pashanya 1:13).

- ''Yesu Kristu...akapingula abamweo (abali no mweo) na bafwa pa kumoneka kwakwe no bufumu bwakwe icilongwe ca bulungami, cintu Shikulu, kapingula mulungami, akapeela pa bushiku bulya'' (2 Timote 4:1,8).

- Pa kubwela kwakwa Mesiya mu nshiku sha kupelekesha, ''abengi ba muli bene abasendama mu tulo mu lukungu lwa mushili (pashanya Ukutendeka 3:19) bakabuuka, bamo ku mweo wa muyayaya, na bamo ku nsoni'' (Daniele 12:2).

- Ilyo Kristu akeesa mu kupingula, abali ''mu nshiishi...bakeesa kunse; bene abo abacita icisuma, ku kubuuka kwa mweo; na bene abo abacita ububi, ku kubuuka kwa kusekwa'' (Yohane 5:25-29).

- ''Ine (Yesu) ndeisa bwangu; ne cilambu cili na ine, ukupeela umuntu onse ukulingana ngefyo umulimo wakwe ukaba'' (Ukusokolola 22:12). Ifwe tatuya ku mulu ku kukwata icilambu - Kristu aleleeta cene kuli ifwe ukufuma ku mulu.

Yesu ukuleeta pamo nankwe icilambu cesu calola mukuti cene calipekanishiwa ifwe mu mulu, lelo cene cikaleetwa kuli ifwe pa calo pa kwisa kwa cibili; ''ubupyani'' bwesu bwa calo icalailwe kuli Abrahamu buli mu musango uyu ''ubwasungilwa imwe mu mulu, mwe bali abasungwa na maka yakwa Lesa ukupitila mu citetekelo mwi pusukilo ilyaiteyanya ukusokololwa mu nshita ya kupelekesha'' iya kwisa kwakwa Kristu (1 Petro 1:4,5).

Ukwishiba ici cilepeela ifwe amaka ya kwilula amashiwi ayashiilukwa bwino muli Yohane 14:2,3: ''Ine (Yesu) ndeya ku kupekanisha imwe icifulo (pashanya icilambu ''icasungwa mu mulu''), ine nkabwela libili, no kupokelela imwe kuli nemwine, ukuti uko ine nkaba, imwe mwingaba kulya pamo''. Yesu alanda pambi ukuti wene akeesa libili ku kupeela ifwe ifilambu fyesu (Ukusokolola 22:12), na ifwe natumona ukuti ifi fikapeelwa pa cipuna cakwe ca bupingulo. Wene akateeka pa cipuna ca bufumu cakwa Dabidi mu Yerusalemu ''umuyayaya'' (Luka 1:32,33). Wene akekala pee na pee pano pa calo, kabili uko wene akaba - mu Bufumu bwakwa Lesa pa calo - ifwe tukaba kulya pamo. Eico icilayo cakwe ''ukupokelela imwe kuli nemwine'' kuti cabelengwa ngo kulondolola ifwe ukuba abapokelelwa na wene pa bupingulo. Amashiwi mu ciGreek, ''ukupokelela imwe kuli nemwine'', yacitika kabili muli Mateo 1:20 ukukuma kuli Yosefe ''ukubuula ku mwine'' Maria ngo mukashi wakwe. Eico cene tacilekabila ukusontelela fye ku kwenda kwa mubili ukulola kuli Yesu.

Apo icilambu cikapeelwa fye pa bupingulo pa kubwela kwakwa Kristu, cene cakonka ukuti abalungami na babifi baya ku cifulo cimo cine lintu bene bafwa, ekutiila inshiishi. Takuli bulekano ubupangwa pali bene mu mfwa shabo. Ifyalakonkapo fili cishininkisho nganshi pali ici:-

- Yonatani ali mulungami lelo Sauli mubifi, nomba ''mu mfwa yabo bene tabali abalekana'' (2 Samwele 1:23).

- Sauli, Yonatani na Samwele bonse baile ku cifulo cimo cine pa mfwa (1 Samwele 28:19).

- Umulungami Abrahamu ''alonganikwe ku bantu bakwe'', nangu ifikolwe, pa mfwa; bene bali ni bakapepa ba tulubi (Ukutendeka 25:8; Yoshua 24:2).

- Abamano ya bumupashi na bapumbu bamona imfwa imo ine (Lukala milandu 2:15,16).

Ifi fyonse fyapinkana nganshi no kutunga kwa 'bwina Kristu' ubwalumbuka. Ukusambilisha kwabo ukuti abalungami baya ku mulu ilyo line fye pa mfwa kwaonaula ukukabila kwa kubuuka kwa bafwa no bupingulo. Lelo ifwe natumona ukuti ifi fili milimo iyacindama mu kupanga kwakwa Lesa ukwe pusukilo, eico kabili mu mbila ya Mbila nsuma. Amano ayalumbuka yalanda ukuti umuntu umo umulungami afwa no kulambulwa ukuya ku mulu, ukukonkwa na bambi ubushiku bwakonkapo, umweshi wakonkapo, umwaka wakonkapo. Ici capinkana nganshi no kusambilisha kwa Baibele ukuti abalungami bonse bakalambulwa capamo, pa nshita imo ine:-

- Impanga shalekanishiwa ukufuma ku mbushi pa bupingulo, imo imo. Ilyo ubupingulo bwapwa, Kristu akalanda ku mpanga shonse ishilongene ku kuboko kwakwe kwa kukulyo, ''Iseni, imwe abapaalwa bakwa Tata, pyaneni Ubufumu ubwapekanishiwa imwe'' (Mateo 25:34). Eco impanga shonse shikapyana Ubufumu pa nshita imo ine (pashanya 1 Abena Korinti 15:52).

- Pa ''kuseepa'' kwa kubwela kwakwa Kristu no bupingulo, abo bonse ababomba mu Mbila nsuma ''bakasekelela capamo'' (Yohane 4:35,36 pashanya Mateo 13:39).

- Ukusokolola 11:18 kulondolola ''inshita ya bafwa, ukuti bene bapingulwe'' nge nshita ilyo Lesa ''akapeela icilambu ku babomfi Benu...abashila...bene abo abatiina ishina Lyenu'' - ekutiila abatetekela bonse capamo.

- Aba Hebere 11 ni chapta atantika abengi ba mu bantu abalungami ba mu Cipingo ca Kale. Vesi 13 alandapo: ''Bonse aba balifwile mu citetekelo, ukwabulo kukwata ukupokelela ifilayo'' ifyacitilwe kuli Abrahamu pamulandu we pusukilo ukupitila mu kwingila mu Bufumu bwakwa Lesa (Aba Hebere 11:8-12). Cene cakonka ukuti pa mfwa yabo, abantu aba, umo umo, tabaile ku mulu ku kupokelela icilambu. Umulandu wa ici wapeelwa mu vesi 39,40: Bene ''tabapokelele icilayo: Lesa pa kupekanisha ifwe icintu icisuma ukucilapo, ukuti bene ukwabula ifwe becitwa abapwililila''. Ukukokola mu kupeela icilambu cabo icalailwe kwali mulandu wakuti cene cali kupanga kwakwa Lesa ukuti abatetekela bonse balingile ''ukucitwa abapwililila'' capamo, pa nshita imo ine. Ici cikaba pa bupingulo, pa kubwela kwakwa Kristu.