4.5 Ukubuuka Kwa Bafwa

Baibele akonkomesha ukuti icilambu ca balungami cikaba pa kubuuka kwa bafwa, pa kwisa kwakwa Kristu (1 Tesalonika 4:16). Ukubuuka kwa bafwa abo cikumine (mona Isambililo 4.8) kukaba e cintu ca ntanshi Kristu akacita; ici cikakonkwa no bupingulo. Nga 'umweo' waile ku mulu pa mfwa tekuti kube ukukabila ukubuuka kwa bafwa. Paulo alandile ukuti nga takuli kubuuka kwa bafwa, ninshi ukutukuta konse ukwa kuba uwanakila kuli Lesa kuli kwa fye (1 Abena Korinti 15:2). Bushe icine cine wene kuti apeelulula umusango uyu nga wene atetekele ukuti wene kabili akalambulwa no 'mweo' wakwe ukuya ku mulu pa mfwa? Icisontelelo ici cakuti wene atetekele ukubuuka kwa mubili ukuba e musango weka uwa cilambu. Kristu akoseleeshe ifwe no kwenekela kwakuti icilambu pa kwikala kwa cishinka nomba kukaba pa ''kubuuka kwa bafwa'' (Luka 14:14).

Kabili icishinka cifwile ukukonkomeshiwa icakuti Baibele tasambilisha umusango nangu umo uwa kwikalilamo kano fye mu musango wa mubili - ici cakuma kuli Lesa, Kristu, Bamalaika na bantu. Pa kubwela kwakwe, Kristu ''akapilibula umubili wesu uwasaaluka ukuti wene ube uwapangwa mu kupalana no mubili wakwe wa bukata'' (Abena Filipi 3:20,21). Ngafintu wene nomba alikwata umusango wa mubili utuntulu, uubombela fye no Mupashi ukucila umulopa, efyo ifwe tukaakana icilambu icapalana. Pa bupingulo ifwe tukapokelela icilambu pafyo ifwe twaikala mu mweo wesu uyu mu musango wa mubili (2 Abena Korinti 5:10). Abo abaleikala mu mweo wa bumubili bakashala no mubili wabo wa mfwa uulipo, untu ukabwelela ku lukungu mu kubola; ilyo abo mu myeo yabo baleesha ukucimfya amano ya bumubili kuli yalya aya Mupashi ''ku Mupashi eko bakaseepa umweo wa muyayaya'' (Abena Galatia 6:8) mu musango wa mubili-waisushiwamo Umupashi.

Kabili kuli icishininkisho icalinga icakuti icilambu ca balungami cikaba mu musango wa mubili. Ilyo ici casuminishiwa, icikalamba ca kucindama kwa kubuuka kwa bafwa cilingile ukuba pa mbilibili. Umubili wesu uulipo mu cishinka ulaleka ukubako pa mfwa; nga ifwe kuti twaishiba fye umweo wa pee no kukaanafwa mu musango wa mubili, ninshi cene cakonka ukuti imfwa ifwile ukuba musango wa kukaanaishiba, ukufika ku nshita ilyo umubili wesu ukalengwa libili elyo no kupeelwa umusango wakwa Lesa.

Onse 1 Abena Korinti 15 asosa mu kushika palwa kubuuka kwa bafwa; cene lyonse calinga ukubelengwa bwino bwino. 1 Abena Korinti 15:35-44 alondolola umusango wakuti ngafintu ulubuto lubyalwa elyo kabili lwafuma mu mushili ku kupeelwa umubili kuli Lesa, efyo abafwa mu musango umo wine bakeema, ku kulambulwa no mubili. Ngafintu Kristu aimine ukufuma mu nshiishi no kukwata umubili wakwe wa mfwa ukupilibulwa ukuba uushifwa, efyo uwatetekela wa cine akaakana icilambu cakwe (Filipi 3:21). Ukupitila mu lubatisho ifwe twaikuminisha fwebene ku mfwa yakwa Kristu no kubuuka kwakwe ku bafwa; ukulanga icitetekelo cesu ukuti ifwe, pamo, tukaakana icilambu cintu wene apokelele ukupitila mu kubuuka kwakwe ku bafwa (Abena Roma 6:3-5). Ukupitila mu kwaakana amacushi yakwe nomba, ifwe kabili tukaakana icilambu cakwe: ''Ukusenda konse konse (nomba) mu mubili ukufwa kwakwa Shikulu Yesu, ukuti kabili umweo wakwa Yesu wingacitwa ukumoneka mu mubili wesu'' (2 Abena Korinti 4:10) ''Wene uyo uwaimishe Kristu ukufuma ku bafwa kabili akabuusha imibili yenu ya mfwa ku mupashi wakwe'' (Abena Roma 8:11). Pakuba ne subilo ili, eico ifwe tulolela ''ukulubuka kwa mubili'' wesu (Abena Roma 8:23), ukupitila mu mubili ulya ukuba uushifwa.

Isubilo ili ilya cilambu mu mubili mu cituntulu lyailukwa na bantu bakwa Lesa ukufuma ku nshita sha kuntanshi sana. Abrahamu alailwe ukuti wene, umwine, akapyana icalo ca Kanani umuyayaya, ngafintu wene icine cine aendawike muli cene (Ukutendeka 13:17; mona Isambililo 3.4). Icitetekelo cakwe mu filayo filya cali no kuleta ukutetekela kwakwe ukuti umubili wakwe mu musango umo, pa bushiku bumo kuntanshi, ukapuupuutulwa no kucitwa uushifwa, pakuti ici cikabe icingacitwa.

Yobo alondolwele bwino bwino ukwiluka kwakwe ukwakuti, nangu umubili wakwe ukaliiwa ne myambo mu nshiishi, wene, mu musango wa mubili, akapokelela icilambu cakwe: ''Kalubula wandi aikala no mweo, kabili...akeminina pa bushiku bwa kuntanshi pa calo kabili: nangu panuma ya nkanda yandi imyambo yaonaula umubili uyu (''panuma inkanda yandi yaonaulwa'', R.A.V.), lelo mu mubili wa munofu wandi (nangu mu musango wa mubili) ine nkamona Lesa: untu ine nkaimwena nemwine, na menso yandi yakamona, kabili tali umbi: nangu imfyo shandi shibe ishaonaika mukati kandi'' (Yobo 19:25-27). Isubilo lyakwa Esaya lyali ilyapalana: ''Umubili wandi uwafwa uka...buuka'' (Esaya 26:19).

Amashiwi ayapalana nganshi yasangwa mu lyashi lya mfwa yakwa Lasaro, cibusa wine wakwa Yesu. Mu cifulo cakusansamusha inkashi sha muntu uyu pa kulanda ukuti umweo wakwe waile ku mulu, Shikulu Yesu asosele ulwa bushiku bwa kubuuka kwa bafwa: ''Indume yobe ikabuuka libili''. Ukwasuka bwangu kwa nkashi yakwa Lasaro Marita kwalanga ifyo ici caishibiikwe nganshi na Bena Kristu bantanshi: ''Marita alanda kuli wene, ine ninjishiba ukuti wene akabuuka libili mu kubuuka kwa bafwa pa bushiku bwa kupelekesha'' (Yohane 11:23,24). Pamo nga Yobo, umwanakashi tailwiike imfwa ukuba e mwinshi ku mweo wa kutuusha mu mulu, lelo, mu kupilibula, aloleeshe kuntanshi ku kubuuka kwa bafwa ''pa bushiku bwa kupelekesha'' (pashanya ''ubushiku bwa kuntanshi'' bwakwa Yobo). Shikulu alaya ukuti: ''Eico umuntu onse uwaumfwa, no kusambilila palwakwa Tata...ine nkabuusha wene pa bushiku bwa kupelekesha'' (Yohane 6:44,45).