Ifishinte Fya Muli Baibele
Isambililo 11: Umweo Muli Kristu
Ukulondolola | Umushilo | Ukuboomfya Amaka | Amashiwi Ya Buteeko | Amaliila Ye Sonde | Ukusambilila Baibele | Ipepo | Ukubila | Umweo Mu Lukuta | Ukumokaula Umukate | Icupo | Isenge | Amepusho

11.3.5 Ukumokaula Umukate

Ukwendela pamo ne pepo no kubelenga Baibele, ukunakila kwi funde lyakwa Kristu ilya kumokaula umukate no kunwa umwangashi mu kwibukisha ilambo lyakwe kuli cikalamba. ''Citeni ici mu kwibukisha ine'', Yesu aakonkomeeshe (Luka 22:19). Cene cali kufwaya kwakwe ukuti abakonka wene balingile ilingi ukucita ici ukufika ku kwisa kwakwe kwa cibili, lintu Yesu akaakana umukate no mwangashi na bene libili (1 Abena Korinti 11:26; Luka 22:16-18).

Umukate wimininako umubili wakwa Kristu uyo uwapeelwe pa capindama, no mwangashi mulopa wakwe (1 Abena Korinti 11:23-27). Abatetekela bantanshi bamoneka nga baasungile umulimo uyu ilingi (Imilimo 2:42,46), nalimo umuku umo mu mulungu umo (Imilimo 20:7). Ifwe icine cine nga twalitemwa Kristu, ifwe tuli no kusunga amafunde yakwe (Yohane 15:11-14). Ifwe nga twalikwata fwebene ukwampana kwa cine na wene, ifwe tuli no kufwaya ukwibukisha ilambo lwakwe ngafintu wene akonkomesha, na mu kucita ici ukuikoselesha fwebene pa kwibukisha kwe pusukilo lilya ilikalamba lintu wene aaboombele. Inshita ya kwikala tondolo mu kwibukisha amacushi yakwe pa capindama ikalenga ifyakweshiwa fyesu fwebene ukumoneka utunono lintu fyapashaniwa kuli filya ifyakwa Shikulu wesu.

Ukumokaula umukate mu cituntulu mulimo wa kwibukisha; takuli icintu nangu cimo icankaama icicitika ukufuma mu kucita wene. Wene walingana no mutebeto wa Cakucilila pesamba lya mafunde yakwa Mose (Luka 22:15; 1 Abena Korinti 5:7,8). Iyi yaali ni nshila ya kwibukisha ukupokololwa ukukalamba ukufuma mu Egupti kuntu Lesa aaboombele ukupitila muli Mose pali Bemba wa Kashika. Umulimo wa kumokaula umukate usenda ifwe ukuya kunuma kwi pusukilo lyesu ukufuma ku lubembu ukupitila muli Kristu, ilyacitilwe icingacitika pa capindama kabili kuli ilyo ifwe twasangwike abakumako pa lubatisho. Eico ukusunga ifunde ili kulingile ukuba cintu cimo ico ifwe mu cifyalilwa tulefwaya ukucita.

Mu cituntulu ukulya umukate no kunwa umwangashi kulenga ukutemwa kwakwa Kristu pali ifwe, ne fintu fyonse ifikumine kwi pusukilo lyesu, ukuba ifya cine sana umuku na umbi. Eico ukumokaula umukate nalimo umuku umo mu mulungu umo uli cishibilo ca musango wa bumupashi uwa bumi. Umuntu umo nga tekuti acite cene na batetekela banankwe aba Cine, cene cilingile ukucitwa na wene eka. Takuli umwakufisama ukulingile ukusuminishiwa ukulesha ifwe ukusunga ifunde ili. Ifwe tulingile ukucita amaka yonse ukusunga umukate no mwangashi mupepi na ifwe ifya pa mulimo uyu, nangu mu nshita ishayafya nangu fye ukubulwa kwa ifi takulingile ukukaanya ifwe ukwibukisha Kristu mu nshila iyasontwa ngefyo ifwe twingacita na maka yonse. Yesu aaboomfeshe ''ifisabo fya mwangashi'' (Luka 22:18), eico na ifwe tulingile ukuboomfya umwangashi wa kashika.

Ukubuula ifishibilo fya macushi yakwa Kristu ne lambo lyakwe e mucinshi uwasansukisha untu umwaume nangu umwanakashi engakwata. Ukukuma kuli fyene ukwabula amano ukusonta kufyo fyene fyaimininako cili mupepi no kupoonta, pa kumona ukuti ''ilyo lyonse imwe mulya umukate uyu, no kunwa ulukombo ulu, imwe mulanga imfwa yakwa Shikulu...Eico uyo onse ukalya umukate uyu, no kunwa ulukombo ulu ulwakwa Shikulu, ukwabula ukulinga, akaba no mulandu wa mubili no mulopa wakwa Shikulu'' (1 Abena Korinti 11:26,27). Eico umulimo wa kumokaula umukate ulingile ukucitwa pa nshita ne cifulo apo apashili na kuba ifyakupumfyanya ne fyakucilinganya mu kwenda kwa matontonkanyo ya muntu. Ici kuti calundamo ukucita wene ulucelo sana nangu ubushiku sana, mu muputule wa tulo nangu mu cifulo cimbi icalinga. Ifwe kabili twasokwa, ''Lekeni umuntu aipime umwine, kabili efyo (mu mupashi ulya uwafuuka uwa kuipima) lekeni alyeko umukate ulya, no kunwako ulukombo lulya'' (1 Abena Korinti 11:28). Eico ifwe tulingile ukupampamika amano yesu pe lambo lyakwa Kristu, nalimo pa kulolesha mu fyalembwa fya Mbila nsuma palwa kutanikwa kwakwe, intanshi ifwe tatulabuula ifishibilo ifi. Mu kucita ici bwino bwino, ifwe mu kushininkisha tukapima kampingu wesu fwebene ukulola kuli Kristu, pamo.

Ukutantika kwa mulimo ukwalinga pa kumokaula umukate kuli ifi:-

1. Ipepo - ukulomba amapaalo yakwa Lesa pa kukumana uku; Ukwisula Kwakwe amenso yesu ku Cebo Cakwe; ukwibukisha ukukabila kwa batetekela bambi; ukutasha Wene pa kutemwa Kwakwe, nokucila ngefyo kwalangwa muli Kristu, no kupepa ukukumine ku fintu fimbi ifyashininkishiwa.

2. Ukubelenga amalembo ya muli Baibele aya bushiku ubu ngefyo calangililwa muli ''Bible Companion'' (''Cibusa wakwa Baibele'').

3. Ukutontonkanya pa masambililo ayo ayali no kusambililwa ukufuma muli yene, nangu ukubelenga 'icakukoselesha' - ukusambilila kwa Baibele pali yalya machapta uko ukutungulula ifwe ukulola ku kuboomba kwa mulimo wesu - uwa kwibukisha Kristu.

4. Ukubelenga 1 Abena Korinti 11:23-29.

5. Inshita ya kwikala tondolo iya kuipima.

6. Ipepo pa mukate.

7. Ukumokola umukate no kulya iciputulwa icinono cauko.

8. Ipepo pa mwangashi.

9. Ukunwa umwangashi panono.

10. Ipepo lya kusondwelela.

Umulimo onse ulingile ukusenda fye ukucila pali ora umo.


  Back
Home
Next