11.3.2 Ipepo

Ukuboomba kumbi ukukalamba ukulingile ukukusha ni kulya ukwe pepo. Panuma ya kwibukishako ifwe ukuti kuli ''kawikishanya umo pakati kakwa Lesa na bantu, umuntu Yesu; uyo uwaipeele umwine icakufuta pali ifwe bonse'', Paulo akonkomesha icituntulu icafuma mu kwiluka umulimo wakwa Kristu: ''Eico ine ndefwaya ukuti abaume bapepe konse konse...ukwabula icipyu no kutwishika'' (1 Timote 2:5-8). ''Pantu ifwe tatwakwata shimapepo mukalamba uyo ushingeekatwa ne fyakunaka fyesu; lelo mu misango yonse aatuunkilwe ukupalana ngefyo ifwe tuli, lelo ukwabula ulubembu. Eico lekeni ifwe twise no kupama ku cipuna ca bufumu ica cikuuku, ukuti ifwe twingakwata uluse, no kusanga icikuuku ca kwafwa mu nshita ya kukabila'' (Aba Hebere 4:15,16).

Ukwishiba icine cine ukuti Kristu ni Shimapepo Mukalamba wesu ku kupeela amapepo yesu mu maka kuli Lesa, kulingile ukukoselesha ifwe lyonse ukupepa mu citetekelo. Lelo, ipepo talilingile ukuba fye 'ukutantika kwa fifwaikwa' ukwa kupeela kuli Lesa; ukupeela ukutootela pa fyakulya intanshi ya filyo, pa kusungwa umutende pa nyendo na fimbipo kulingile ukupanga iciputulwa icacindama ica mapepo yesu.

Ukubiika fye amaafya yesu kuntanshi yakwa Shikulu mwi pepo kulingile, ukwine kweka, ukupeela amano ayakalamba aya mutende...''Mu fintu fyonse (takuli icintu icacepesha ukupepelwapo) mwi pepo...no kupeela ukutootela lekeni ukwipusha kwenu kube ukwaishibikwa kuli Lesa. No mutende wakwa Lesa, uyo uwapita pa kwiluka konse, ukasunga imitima yenu na mano yenu'' (Abena Filipi 4:6,7).

Amapepo yesu nga yali ayalingana no kufwaya kwakwa Lesa, icine cine yali no kwasukwa (1 Yohane 5:14). Ifwe kuti twaishiba ukufwaya kwakwa Lesa ukupitila mu kusambilila kweesu kwa Cebo Cakwe, ico icisokolola Umupashi/amano Yakwe kuli ifwe. Eico ukusambilila kweesu kwa Baibele kulingile ukusambilisha ifwe ifya kupepa ne fintu ifya kupepelapo pamo, na mu kucita ifi ukulenga amapepo yesu ukuba aya maka. Eico ''Nga...ifyebo fyandi fyaikala muli imwe, imwe mukeepushe ico imwe mulefwaya, na cene cikacitilwa imwe'' (Yohane 15:7).

Kuli ifilangililo ifingi ifye pepo mu Malembo (Amalumbo 119:164; Daniele 6:10). Ulucelo ne cungulo, pamo na mapepo ayanono ayepi aya kupeela ukutootela munshita ya kasuba cilingile ukumonwa nge cinono fye.