3.5 Icilayo Kuli Dabidi

Dabidi, pamo nga Abrahamu na bambi abengi abakapokelela ifilayo fyakwa Lesa, takwete ubwikashi ubwanaka. Wene akulile ngo mwana mwaume uwacepesha mu lupwa ulukalamba ico, mu Israele wa myaka 1000 intanshi ya kwisa kwakwa Kristu, calepilibula ukulacema impanga no kutwala ifyalefwaikwa kuli bamunyina abakalamba abacilumba (1 Samwele 15-17). Mu nshita iyi wene asambilile icipimo ca citetekelo ica muli Lesa cintu abantu abanono fye bafikako ukufuma pa nshita ilya.

Ubushiku bwaishile lintu abaIsraele bafikiilwe no kusonsombwa ukufuma ku benamupalamano babo abalubuli, abaPelishiti; bene basonsombelwe ukuleka umo uwa mu baume babo alwe na cimuntu ci Goliati, impalume ya baPelishiti, pa kumfwana ukuti uyo onse uwacimfya ubulwi bulya e wali no kuteeka abacimfiwa. Ku kwafwa kwakwa Lesa Dabidi acimfishe Goliati pa kubomfya umulegeni, ico icanonkeeele wene ukulumbuka ukwacilapo na pa mfumu yabo (Sauli), ''Akalumwa kali bunkalwe nge nshiishi'' (Ulwimbo lwa nyimbo 8:6), amashiwi yashininkishiwe na Sauli pa kulacusha Dabidi pa myaka 20 iyakonkelepo, ukulabutusha wene nga kwindi ukushinguluka amatololo ya ku kapinda ka kukulyo ka Israele.

Panuma ya fintu ifi Dabidi asangwike imfumu, na pa kulanga ukutasha kwakwe pa kutemwa kwakwa Lesa kuli wene mu nshita ya matololo ya mweo wakwe, wene apingwile ukukuulila Lesa itempele. Ubwasuko ubwafumine kuli Lesa bwakuti umwana mwaume wakwa Dabidi, Solomoni, akakuula itempele no kuti Lesa alefwaya ukukuulila Dabidi ing'anda (2 Samwele 7:4-13). Elyo pakonkele icilayo icalondololwa ico icabwekeshapo ifingi pa fyalandilwe kuli Abrahamu, kabili ifyo pamo fyaiswishemo ukulondolola na kumbi:-

''Kabili ilyo inshiku shobe shafikilishiwa, na iwe ukasendama na ba wiso, ine nkemika ulubuto lobe panuma yobe, ulo ulukafuma mu mala yobe, na ine nkapampamika ubufumu bwakwe. Wene akakuula ing'anda ye shina lyandi, na ine nkapampamika icipuna ca bufumu bwakwe umuyayaya. Ine nkaba wishi, na wene akaba umwana wandi umwaume. Nga wene acita ubupulumushi, ine nkafopaula wene ku nkoto ya bantu, na ku mpumo sha bana ba bantu: Lelo uluse lwandi talwakafumepo pali wene, ngafintu ine nafumishepo lwene pali Sauli, untu ine natamfishe ukufuma kuntanshi yobe. Kabili ing'anda yobe no bufumu bobe fikaba ifyapampamikwa umuyayaya kuntanshi yobe: icipuna cobe ca bufumu cikaba icapampamikwa umuyayaya'' (vesi 12-16).

Ukufuma mu masambililo yesu ayali panuma ifwe kuti twaenekela ''ulubuto'' ukuba Yesu. Ukulondololwa kwakwe ngo mwana mwaume wakwa Lesa (2 Samwele 7:14) kwashininkisha ici, nge ficita ifyakusontelela fimbi ifingi mu fiputulwa fimbi ifya Baibele:-

- ''Ine nine...bufyashi bwakwa Dabidi'', efyo Yesu alandile (Ukusokolola 22:16).

- ''(Yesu), uwacitilwe ku lubuto lwakwa Dabidi ukulingana no mubili wa munofu'' (Abena Roma 1:3).

- ''Mu lubuto lwa muntu uyu (Dabidi) Lesa, ukulingana ne cilayo Cakwe, naimya umupusushi mu Israele, Yesu'' (Imilimo 13:23).

- Malaika aebele nacisungu Maria ulwa mwana wakwe umwaume, Yesu: ''Shikulu Lesa akapeela kuli wene icipuna ca bufumu cakwa wishi (icikolwe) Dabidi... na ku bufumu bwakwe takwakabe impela (Luka 1:32,33). Ici cilesonta icilayo ca lubuto lwakwa Dabidi, muli 2 Samwele 7:13, kuli Yesu.

Na pa kushininkishiwa bwino bwino ulubuto nga Yesu, ifyakulondolola ifingi nomba fyaishibikwa:-

-1) THE SEED

-1) ULUBUTO

''Ulubuto lobe...ulukafuma mu mala yobe...ine nkaba wishi, na wene akaba umwana wandi umwaume.'' ''...uwa mu cisabo ca mubili obe ine nkabiika pa cipuna cobe ca bufumu'' (2 Samwele 7:12,14; Amalumbo 132:10,11). Yesu, ulubuto, ali no kuba wa mu bufyashi bwakwa Dabidi mu mubili, icine cine, lelo no kukwata Lesa nga Wishi. Ici cali fye no kufikilishiwa pa kufyala kwakwa nacisungu ngafintu calondololwa mu Cipingo Cipya; nyina wakwa Yesu ali ni Maria, uwa mu bufyashi bwakwa Dabidi (Luka 1:32), lelo takwete wishi wa buntunse. Lesa abombele mu cisungusho mwi fumo lyakwa Maria ku Mupashi wa Mushilo pa kulenga wene ukwimita Yesu, eico kabili Malaika alandilepo ati, ''eico kabili cilya cintu ica mushilo icikafyalwa muli iwe cikeetwa umwana mwaume wakwa Lesa''

(Luka 1:35). Uku ''ukufyala kwakwa nacisungu'' kwali e nshila imo fye intu icilayo ici kuli Dabidi cali no kufikilishiwa bwino bwino.

-2) THE HOUSE

-2) ING'ANDA

''Wene akakuulila ishina lyandi ing'anda'' (2 Samwele 7:13) calanga ukuti Yesu akakuula itempele lyakwa Lesa - ilya cine cine ne lya bumupashi pamo. Esekiele 40-48 alondolola ifyo mu Millennium (imyaka 1000 ya kubalilapo ya Bufumu bwakwa Lesa panuma Yesu nabwela pa calo) itempele likakuulwa mu Yerusalemu. ''Ing'anda'' yakwa Lesa ni mulya Wene atemwa ukwikala, na Esaya 66:1,2 aeba ifwe ukuti Wene akeesa ku kwikala mu mitima ya bantu abo abanakila ku cebo Cakwe. Eico Yesu alekuula itempele lya bumupashi ukuti Lesa ekale muli lyene, ilyapangilwa na batetekela ba cine. Ukulondololwa kwakwa Yesu nge libwe lya kutendeka lye tempele lyakwa Lesa (1 Petro 2:4-8) no kwa Bena Kristu nga mabwe ye tempele (1 Petro 2:5) nomba kwaingila bwino mu cifulo.

-3) THE THRONE

-3) ICIPUNA CA BUFUMU

''Ine nkapampamika icipuna cakwe (Kristu) ica bufumu umuyayaya...ing'anda yobe (Dabidi) no bufumu bobe...icipuna cobe ica bufumu cikaba icapampamikwa umuyayaya (2 Samwele 7:13,16 pashanya Esaya 9:6,7)''. Eico ubufumu bwakwa Kristu bukashintilila pa bufumu bwakwa Dabidi ubwakwa Israele; ici capilibula ukuti ubufumu bwakwa Lesa ubuleisa bukaba e kupampamikwa libili kwa bufumu bwakwa Israele - mona Isambililo 5.3 ukulundapo pali ici. Pa kufikilisha icilayo ici, Kristu afwile ukuteeka pa ''cipuna ca bufumu'' cakwa Dabidi, nangu pa cifulo ca bukateeka. Ici cishininkisho cimbi icakuti ubufumu bufwile ukupampamikwa pano pa calo pa mulandu wa kufikilisha ifilayo ifi.

-4) THE KINGDOM

-4) UBUFUMU

''Ing'anda yobe no bufumu bobe fikaba ifyapampamikwa umuyayaya kuntanshi yobe'' (2 Samwele 7:16) calangilila ukuti Dabidi akamona ukupampamikwa kwa bufumu bwa pee bwakwa Kristu. Eico ici cali cilayo ca mu musango umbi ukuti wene akabuushiwa ukufuma ku bafwa pa kubwela kwakwa Kristu pakuti wene akamone na menso yakwe umwine lintu ubufumu bulebiikwa pe sonde lyonse, na Yesu ukulateeka ukufuma ku Yerusalemu.

Ifintu ifi ifyalailwe kuli Dabidi fili ifyacindama nganshi ukufiiluka. Dabidi mu buseko asosele ulwa fintu ifi nge ''cipingo ca muyayaya...ici cili e pusukilo lyandi lyonse no kukabila kwandi konse'' (2 Samwele 23:5). Ifintu ifi fikumine kwi pusukilo lyesu pamo; ukusekelela muli fyene cilingile ukuba e kukabila kwesu konse mu musango umo wine. Eico na kabili icishinka cacitwa ukuti amasambilisho aya yali ayacindama. Cene ca busanso icakuti ubwina Kristu bwalelo busambilisha amasambilisho ayo ayapinkana ne fintu ifi ifya cine ifyawamisha:-

- Nga Yesu mu cituntulu ''akale eko ali'', ekutiila wene aikele ngo muntu intanshi wene talafyalwa, ninshi ici cacita ubuwelewele ifilayo ifi ifyakuti Yesu akaba ''ulubuto'' lwakwa Dabidi, nangu uwa mu bufyashi bwakwe.

- Nga ubufumu bwakwa Lesa bukaba mu mulu, ninshi Yesu tekuti apampamike libili ubufumu bwakwa Dabidi ubwakwa Israele, kabili tekuti wene ateeke pa ''cipuna ca bufumu'' cakwa Dabidi nangu pa cifulo ca bukateeka. Ifintu ifi fyali icine cine pa calo, eico kabili ukupampamikwa libili ukwa fyene kufwile ukuba mu cifulo cimo cine.

FULFILMENT IN SOLOMON?

UKUFIKILISHA MULI SOLOMONI?

Umwana mwaume wakwa Dabidi icine cine, Solomoni, afikiliishe iciputulwa cimo ca filayo kuli Dabidi. Wene akuulile itempele mu cituntulu ilyakwa Lesa (1 Ishamfumu 5-8), na wene akwete ubufumu bwa bunonshi nganshi. Inko ukufuma ukwashingulukako shatumine abeminishi ku kupeela umucinshi kuli Solomoni (1 Ishamfumu 10), kabili kwali ukupaalwa kukalamba kwa bumupashi ukufuma mu kubomfya kwe tempele. Eico ukuteeka kwakwa Solomoni kwasontele kuntanshi ku kufikilisha kukalamba sana ukwacilapo kwa filayo kuli Dabidi uko ukukamonwa mu Bufumu bwakwa Kristu.

Bamo batunga ukuti ifilayo kuli Dabidi fyalifikilishiiwe umupwilapo muli Solomoni, lelo ici tacisuminishiwe kuli ifi ifyalakonkapo:-

- Ifyakushininkisha ifingi ifya mu Cipingo Cipya filanga ukuti ''ulubuto'' lwali ni Kristu, tali Solomoni.

- Dabidi amoneka kwati asuntikanya ifilayo Lesa acitile kuli wene na filya ifya kuli Abrahamu (1 Imilandu 17:27 = Ukutendeka 22:17,18).

- Ubufumu bwa ''lubuto'' bwali no kuba bwa muyayaya - ubwakwa Solomoni ta bwali ifyo.

- Dabidi aishiibe ukuti ifilayo fyakumine ku mweo wa pee, ifyo ifishasontele ku lupwa lwakwe ulwa mupepi: ''Nangu ing'anda yandi taili ifyo na Lesa; lelo wene nacita na ine icipingo ca muyayaya'' (2 Samwele 23:5).

- Ulubuto lwakwa Dabidi ni Mesiya, Umupusushi ukufuma ku lubembu (Esaya 9:6,7; 22:22; Yeremia 33:5,6,15; Yohane 7:42). Lelo Solomoni panuma apilibwike ukufuma kuli Lesa (1 Ishamfumu 11:1-13; Nehemia 13:26) pa mulandu wa cupo cakwe na balya abali kunse ye subilo lyakwa Israele.