3.3 Icilayo kuli Nowa

Ilyo ukwikala kwa bantunse kwatwalilile panuma ya nshita ya ba Adamu na Efa, abantu basangwike ababi ukulundapo. Ifintu fyafikile pa nshita ilyo ukutumpuluka kwa bantu kwabipile imibeele icakuti Lesa apingwile ukonaula ulya musango wa fintu, ukufumyako fye Nowa no lupwa lwakwe (Ukutendeka 6:5-8). Wene aebelwe ukupaanga araka mukati ka uko wene ne njiminishi sha nama shonse emo bali no kwikala mu nshita lintu isonde lyaleonaulwa ku lyeshi. Mu kupita, kuli icishininkisho cikalamba mu fyakusangasanga ica kutetekela ukuti ilyeshi ili ilikalamba icine cine lyalicitike, ukulunda pa mashiwi ya mu Malembo ayali apabuuta! Mona ukuti icalo (ekutiila icalo ca mushili) tacaonawilwe, kano fye ubuntunse bubifi ubwaimikwe ubwali pali cene: ''ica munofu conse califwile icaleenda pa calo'' (Ukutendekaa 7:21). Yesu (Mateo 24:37) na Petro (2 Petro 3:6-12) bonse pamo bamwene ubupingushi pe sonde lyakwa Nowa ngo bukwete ifipalene ne fintu fikacitika pa kubwela kwa cibili kwakwa Kristu. Efyo ububi bwa kupamfya ubwa bantu mu nshita yakwa Nowa bwalinganishiwa kwi sonde lyesu lya ino nshita, lintu lili mupepi no kukandwa pa kubwela kwakwa Kristu.

Pamulandu wa bantu ukuba mu musango ukulamba wa lubembu no kupekanya kwa kuyonaula kuntu ici calo cilebombapo, kuli ukwima kwa kutetekela, na pakati fye ka bena Kristu, ukuti ici calo cikonaulwa. Aya mano yalanga apabuuta ukupwililika kwa kubulwo kwishiba kwa mbila ituntulu ya Baibele - iyakuti Lesa na NOMBA alisakamana mu kubomba ne fintu fya calo ici, no kuti bwangu Yesu akabwela ku kupampamika Ubufuma bwakwa Lesa pano pa calo. Nga abantu basuminishiwa ukonaula icalo ici ninshi ifilayo ifi tekuti fye fisungwe. Ubunte ubwingi ubwakuti Ubufumu bwakwa Lesa buli no kuba pa calo bulesangwa mwi Isambililo 4.7 na Isambililo 5. Ino nshita, ifi ifyalakonkapo filingile ukuba icishininkisho icalinga cakuti icalo cino no musango wa fintu fya mu mulu tafyakonaulwe:-

- ''Icalo cintu wene apampamika umuyayaya'' (Amalumbo 78:69).

- ''Icalo caikalilila umuyayaya'' (Lukala milandu 1:4).

- ''Akasuba no mweshi...intanda...imyulu... wene pamo alipampamika fyene umuyayaya umuyayaya: wene alipanga icipoope cintu cishakapite'' (Amalumbo 148:3-6).

- ''Icalo cikaba icaisulamo ukwishiba kwakwa Yehoba ngafintu amenshi yafimba pali bemba'' (Esaya 11:9; Impendwa 14:21) - cakosa, nga Lesa aleka icalo ukuyonaula icine. Ici cilayo tacilafikilishiwa.

- ''Lesa umwine uwabumbile icalo no kupanga cene; wene alipampamika cene; wene talengele cene mukuicusha, wene apangile cene ukwikalwamo'' (Esaya 45:18). Nga Lesa apangile fye icalo ku kumona cene ukonaulwa, ninshi umulimo Wakwe wali mu kuicusha.

Lelo kunuma fye mu Ukutendeka Lesa alaile ici conse kuli Nowa.Lintu wene atendeke ukwikala na kabili mwi sonde lipya ilyalengelwe ne lyeshi, nalimo Nowa alikwete umwenso wakuti kuti kwaba ubonaushi bumbi bwa fyonse. Ilyo lyonse imfula yatendeke ukuloka panuma ya lyeshi, ili itontonkanyo lifwile lyaleisa mu mano yakwe. Eico Lesa apangile icipingo (ekutiila ifilayo ifyakonkana) ukuti ici tacakatale acicitika libili:-

''Ine, mona, ine napampamika icipingo candi na imwe...Ine nkapampamika icipingo candi na imwe (mona ukukonkomesha pali ''INE'' - ica cipeshamano cakwa Lesa ukusala ukucite filayo ku muntu wa kufwa!); kabili takwakabe conse ica munofu ukuputulwa libili na menshi ya lyeshi; kabili takwakabe libili ilyeshi ku konaula icalo'' (Ukutendeka 9:9-12).

Ici cipingo cashininkishiwe no mukolamfula:-

''Ilyo ine naleta ikumbi (lya mfula) pa mulu wa calo, ubuta bukamoneka mwi kumbi: na ine nkebukisha icipingo candi...pakati kandi na imwe...icipingo ca muyayaya pakati kakwa Lesa na conse icibumbwa ca mweo ca mu fyamunofu fyonse ifili pa calo...Ici (umukolamfula) e cishibilo ca ici cipingo'' (Ukutendeka 9:13-17).

Pamulandu wakuti cene cili cipingo ca pee pakati kakwa Lesa na bantu ne nama ifya pa calo, cene cakonka ukuti icalo cifwile ukukwata abantu ne nama ukulaikala pali cene umuyayaya. Ici icine ceka cili cishininkisho cakuti Ubufumu bwakwa Lesa bukaba pa calo ukucila mu mulu.

Eico icilayo kuli Nowa cili e cakukuulapo ca Mbila nsuma ya Bufumu; cene cilangilila ifyo ukwangwa kwakwa Lesa kwalolekesha pa calo ici, ne fyo Wene akwata ukubomba kwa pee na cene. Nangu fye mu cipyu Wene alebukisha uluse lukalamba (Habakuki 3:2), kabili uyu e musango wa kutemwa Kwakwe uwakuti Wene asakamana no kubumbwa kwa nama (1 Abena Korinti 9:9 pashanya Yona 4:11).