10.1 Ubukulu Bwa Kucindama Kwa Lubatisho

Imiku iingi mu Masambililo yantanshi ifwe natulumbula ubukulu bwa kucindama kwa lubatisho; lwene e lutampulo lwa ntanshi ulwa kunakila ku lyashi lya Mbila nsuma. Aba Hebere 6:2 asosa palwa lubatisho nga limo pa masambilisho ayacindamisha. Ifwe twashiile ukulanda pali lwene ukufika pa nshita ino iya panuma pantu ulubatisho ulwa cine kuti lwacitika fye panuma ya kwikata kwa fishinka ififwaikwa ifyo ifyapanga Imbila nsuma. Ifwe nomba twapwisha isambililo lyesu palwa ifi; iwe nga ulefwaya ukusanguka uwaampana icine cine ne subilo likalamba lintu Baibele apeela ukupitila muli Yesu Kristu, ninshi ulubatisho luli icafwaikwa icapwililika.

''Ipusukilo lili lya baYuda'' (Yohane 4:22) mu mano yakuti ifilayo ukukuma kwi pusukilo fyacitilwe kuli Abrahamu na ku lubuto lwakwe epela. Ifwe kuti twakwata fye ifilayo filya ifyacitilwe kuli ifwe nga ifwe twasanguka mu Lubuto, pa kuba ababatishiwa muli Kristu (Abena Galatia 3:22-29).

Eico Yesu aapeele ifunde bwino bwino kuli bakakonka bakwe: ''Imwe kabiyeni mwi sonde monse, no kubila imbila nsuma (iyo ili mu filayo kuli Abrahamu - Abena Galatia 3:8) ku cibumbwa conse. Wene uyo ukatetekela kabili abatishiwa akapusushiwa'' (Marko 16:16). Ukutontonkanya pe shiwi ili ilyakuti ''kabili'' kwasokolola ukuti ukutetekela kwa Mbila nsuma kweka tekuti kupusushe ifwe; ulubatisho taluli icakulundapo icakusalapo fye mu mweo wa Bwina Kristu, lwene luli icikulu icakubalilapo icifwaikwa pe pusukilo. Ici tacili kulanda ukuti umulimo wa lubatisho weka ukapususha ifwe; wene ufwile wakonkwa ne nshita ya mweo yonse iya kutwalilila ukunakila ku Cebo cakwa Lesa. Yesu aakonkomeshe ici: ''Icine cine, icine cine, ine ndelanda kuli imwe, Kano fye umuntu aba uwafyalwa ku menshi na ku mupashi, wene tekuti engile mu bufumu bwakwa Lesa'' (Yohane 3:5).

Uku ukufyalwa ''ku (mu ciGreek 'ukufuma mu') menshi'' kwasontelela ku muntu ukwisa pamulu ukufuma mu menshi ya lubatisho; panuma ya ici, wene afwile ukuba uwafyalwa libili ku mupashi. Ici cili musango uwatwalilila: ''Ukufyalwa libili...ku Cebo cakwa Lesa'' (1 Petro 1:23). Eco cene cili kupitila mu kutwalilila kweesu ukwasuka ku Cebo ca Mupashi efyo ifwe tusanguka abafyalwa ku mupashi (mona Isambililo 2.2).

Ifwe tuli ''ababatishiwa muli Kristu'' (Abena Galatia 3:27), mwi shina lyakwe (Imilimo 19:5; 8:16; Mateo 28:19). Mona ukuti ifwe tubatishiwa muli Kristu - te mu Christadelphians nangu mu kabungwe konse aka bantunse. Eico ukwabula ulubatisho ifwe tatuli ''muli Kristu'', kabili tatuli abafimbwa ku mulimo wakwe uwa kupususha (Imilimo 4:12). Petro apikula umulumbe uwa maka ukushunguluka icishinka ici: wene apalanya araka mu nshita yakwa Nowa kuli Kristu, ukulanga ukuti ngefyo araka aapuswishe Nowa no lupwa lwakwe ukufuma ku bupingulo bulya ubwaishile pa babembu, efyo ulubatisho muli Kristu lukapususha abatetekela ukufuma ku mfwa ya pee (1 Petro 3:21). Nowa ukwingila muli araka kwapashaniwa ku kwingila kweesu muli Kristu ukupitila mu lubatisho. Abo bonse abaali kunse ya araka balyonawilwe ku lyeshi; ukwiminina mupepi na araka nangu ukuba cibusa wakwa Nowa tacali cakwafwa. Inshila fye iye pusukilo ili, kabili yaali, kuba mukati kakwa Kristu/araka. Cene cashininkishiwa ukuti ukwisa kwa cibili, kuntu ilyeshi lyali icipasho (Luka 17:26,27), kuli mupepi pali ifwe (mona appendix 3). Eico ukwingila muli Kristu/araka pa lubatisho kuli ca kufwaikwa icacilamo. Amashiwi ya bantunse icine cine yalafilwa ukusenda umusango wa kufwaikwa uku; icipasho ca muli Baibele ica kwingila muli araka mu nshita yakwa Nowa cili ica maka ukucilapo.

Abena Kristu bantanshi baanakiile ifunde lyakwa Kristu ukuya monse mwi sonde ukubila Imbila nsuma no kubatisha; ibuuku lya Imilimo lili e calembwa ca ici. Icishininkisho ca bukulu bwa kucindama kwa lubatisho cili no kusangwa mu nshila intu icalembwa ici cilekonkomesha ifyo ilyo line abantu baabatishiwe panuma ya kupokelela Imbila nsuma (pamo nga Imilimo 8:12, 36-39; 9:18; 10:47; 16:15). Ukukonkomesha uku kuli ukwailukwa lintu cene caishibikwa ukuti ukwabula ulubatisho ukusambilila kweesu palwa Mbila nsuma kuli mu kuicusha; ulubatisho luli lutampulo ulukalamba ulufwaikwa ukupitapo pa musebo wa kuya kwi pusukilo. Mu milandu imo icalembwa icapuutwamo cimoneka ukulangilila nganshi ifyo, nangu kube imilandu ya buntunse iingi iya kukokosha ulubatisho, ne fyayafya ifingi mu kuboomba umulimo uyu, cene cili icacindama icakuti abantu balingile ukucita amaka yonse ukucimfya fyonse ifi, ku bwafwilisho bwakwa Lesa.

Kasunga wa cifungo pa Filipi mukupumikisha aaposelwe mu bwafya bwa mu mweo wakwe ku cinkukuma cikalamba ico icatobele umupwilapo icifungo cakwe icaikashiwe nganshi. Abafungwa baalikwete inshita iyalinga ukufyuka - icintu cimo icali no kulya umweo wakwe. Icitetekelo cakwe mu Mbila nsuma elyo casangwike icampomfu, icakuti ''muli ora umo wine uwa bushiku (wene) alibatishiwe...apo pene'' (Imilimo 16:33). Nga umuntu umo alikwete icakuleseshamo pa kukokosha ulubatisho ninshi ni wene. Icinkukuma icabipisha mu calo ca Greece pa myaka 3,000, ibumba lya bantu abafungwa mupepi no kucita ukufyuka mu cifungo ukwakupapa ukushatala akubako, no kutiinya kwa kuipaya pa bulekelesha bwa ncito kuleepeela pamulu wa mutwe wakwe, lelo wene aamwene bwino bwino ico icali umulimo umo uwacindamisha ukucitwa mu mweo wakwe onse no buyo bwa pee. Eco wene aacimfishe ubwafya bwa nshita ilya ubwe sonde lyakwe ilyashingulukako (ekutiila icinkukuma), ifyakupamfya fya ncito yakwe iya nshiku shonse no kucilinganishiwa kwa mwenso ukukalamba ifyo wene aisangilemo umwine - pakuti abatishiwe. Abengi abasambi ba lubatisho abashingashinga kuti basenda ukukoselesha kwa cine ukufuma ku muntu ulya. Icakuti wene aacitile umulimo wa citetekelo uwa musango ulya cili cishininkisho icakumanina icakuti wene aalikweete kale ukwishiba ukwalondololwa palwa Mbila nsuma, pakumona ukuti icitetekelo ca mpomfu ica musango ulya cisa fye ukufuma mu kuumfwa Icebo cakwa Lesa (Abena Roma 10:17 pashanya Imilimo 17:11).

Imilimo 8:26-40 yalemba ifyo mushika wa calo ca Ethiopia aalesambilila Baibele wakwe lintu aaninine mwi celeta ukupula mu ciswebebe. Wene aakumenye Filipi, uyo uwalondolwele apakalamba Imbila nsuma kuli wene, ukubikapo ififwaikwa palwa lubatisho. Ukusosa kwa buntunse, cene cifwile ukumoneka icishingacitika ukunakila ifunde lya kubatishiwa mu ciswebebe cilya icabula amenshi. Lelo Lesa tengapeela ifunde lintu Wene aishiba ukuti abantu bamo tekuti banakile. ''Ilyo bene baile mu nshila yabo, bene baishile ku menshi yamo'', ekutiila pa cishiba, apo ulubatisho lwali icingacitwa (Imilimo 8:36). Icacitiike ici cayasuka ku kulondolola ukwabula ishintililo ukwakuti ulubatisho lwa kwibisha lwapekanishiwe fye ukucitwa mu ncende umo umwali amenshi ayengi, ayengasangwa ukwabula ubwafya. Lesa lyonse ali no kupekanya inshila iyalolamo umo umwakunakila amafunde Yakwe.

Umutumwa Paulo aapokelele icimonwa icakupapa ukufuma kuli Kristu ico icasopele kampingu wakwe icakuti mu kwangufyanya wene ''apo pene...aimine kabili alibatishiwe'' (Imilimo 9:18). Nakabili, cene cifwile ukuba icakutuunka kuli wene ukukokosha ulubatisho lwakwe, ukutontonkanya palwa cifulo cakwe mu bantu icacindama ne ncito iya pamulu iyapekanishiwe pali wene mu buYuda. Lelo ulutanda ulu ulwaleima ulwe sonde lya baYuda aacitile ukupingula ukwalungama kabili ukwa nshita ilya ine ukubatishiwa no kusuula inshila ya mweo wakwe iyantanshi. Wene panuma aatontonkenye palwa kusala kwakwe ukubatishiwa: ''Ifyo ifintu ifyali bunonshi kuli ine, ine napendele filya kulufya pali Kristu...Ine nasuminisha ukulufya kwa fintu fyonse (ekutiila ifintu ifyo wene inshita imo aamwene ngo ''kunonka'' kuli wene), kabili mpenda fyene amafi fye, ukuti ine ningakwata Kristu...ukulaba ifintu filya ifyo ifili kunuma (e ''fintu'' fya mweo wakwe uwantanshi uwa buYuda), no kulola ku fintu filya ifyo ifili kuntanshi, ine njipatikisha ukuya pa cifulo ca cilambu'' (Abena Filipi 3:7,8;13,14).

Iyi ni nsoselo yakwa kabutuka wa lubilo ukuituninkisha kuntanshi ku kuputula intambo ya kupwisha ulubilo. Ukushininkisha kwa matontonkanyo ukwa musango uyu no kutulukusha kwa mubili kulingile ukumoneka mu misango ya myeo yesu panuma ya lubatisho. Cene cifwile ukwilukwa ukuti ulubatisho e ntendekelo ya lubilo ukulola ku Bufumu bwakwa Lesa; lwene taluli cishibilo fye ca kuba uwapilibula ifilonganino ne fitetekelo, nangu lwene ukuba umwinshi uwabula imilimo uwakwingila mu mweo wa kutuusha uwakukonka ukwanaka ku fipoope finono ifishatantikwa bwino bwino ifya bwina Kristu. Ulubatisho lukuminisha ifwe ku kutanikwa no kubuuka kwakwa Yesu ukufuma ku bafwa mu mano ya kutwalilila (Abena Roma 6:3-5) - inshita ishaisulamo ukupimpa ukwashininkishiwa mu nshila yonse.

Pamo ngo wanaka, umwaume umukote uwacimfya muli bumupashi, Paulo aali no kwibukisha: ''Ine nshakeene ukunakila ku cimonwa ca mu mulu'' (Imilimo 26:19). Ngefyo cali ca cine kuli Paulo, efyo cene cili kuli bonse abo ababatishiwa bwino bwino: ulubatisho luli e kupingula uko umuntu takalanguluke nakalya. Mu myeo yesu yonse ifwe tuli no kuba abaibukila ukuti ifwe twacitile ukusala ukwalungama. Te kwingi ukupingula kwa buntunse ifwe twingaba abashininkisha umusango uyu. Ilipusho lili no kwasukwa mukushininkisha: 'Bushe mulandu nshi ine nshingabatishiwa?'