9.4 Yesu Ngo Mwiminishi Wesu

Ifwe tumwene ukuti amalambo ya nama mu kupwililika tayaali ayakwimininako abantu ababembu. Yesu aali uwaimininako ifwe, pa kuba mu misango yonse ''ukucitwa uwapalana na bamunyina bakwe''

(Aba Hebere 2:17). ''Wene aasondele imfwa pa muntu onse'' (Aba Hebere 2:9). Ilyo ifwe twacita ulubembu - pamo nga ifwe twakalipa - Lesa kuti aeleela ifwe ''pa mulandu wakwa Kristu'' (Abena Efese 4:32). Ici cili pamulandu wakuti Lesa kuti apashanya ifwe kuli Kristu, umuntu uwapalana na ifwe uyo uwatuunkilwe ukucita ulubembu - pamo ngo kukalipa - lelo uyo uwacimfishe ukutuunkwa konse. Eico Lesa kuti aeleela ifwe ulubembu lwesu - ulwa bukali -pa mulandu wa kuba kweesu muli Kristu, ukufimbwa no bulungami bwakwe. Eico Kristu pa kuba umwiminishi wesu ali e nshila umo Lesa engalangila ifwe icikuuku Cakwe, munshita imo ine ukusunga ifipoope Fyakwe Umwine ifya bulungami.

Yesu nga aali ni Lesa ukucila ukuba fye uwa musango wa mubili wa buntunse, wene nga taali umwiminishi wesu. Ici cili cilangililo cimbi icakuti amano yamo ayakuluba yatungulula ku kuluba kumbi. Pamulandu wa ici, abasambilila ifya mipepele balipanga inshila ishakobenkana ishingi isha kulondolola imfwa yakwa Kristu. Amano ya bwina Kristu ubwaluba yakuti imembu sha muntu shabiikile wene mu nkongole kuli Lesa isho pa lwakwe umwine wene aafililwe ukulipila. Elyo Kristu aafumishepo inkongole sha cila umo na umo uwatetekela ku mulopa wakwe, uwasuumine pa capindama. Bakashimika abengi mu Mayanda ya Mbila nsuma balondolola cene mu musango uyu: ''Cene cali kwati ifwe bonse twabiikilwe mu mulongo ukushintilila ku cibumba, mupepi fye no kulaswa kuli kasebanya. Elyo Yesu aabutukiileko, elyo kasebanya aalashile wene mucifulo ca ifwe, efyo ifwe nomba tuli abantungwa.''

Amasambilisho aya ayakobenkana yali ayabula ukusuminisha ukwakosa ukwa Baibele. Kuli ukupinkana ukwabula ukutwishika ukwakuti Kristu nga aafwile mucifulo ca ifwe, ninshi ifwe tatulingile ukufwa. Pantu ifwe tucili twalikwata umusango wa mubili wa buntunse, ifwe tucili tufwile ukufwa; ipusukilo ukufuma ku lubembu ne mfwa mu kupelekesha likasokololwa pa bupingulo (lintu ifwe tukapeelwa ukukaanafwa). Ifwe tatwapokelele ici pa nshita Kristu aafwile. Imfwa yakwa Kristu yaonawile kasebanya (Aba Hebere 2:14) ukucila kasebanya ukonaula wene.

Baibele asambilisha ukuti ipusukilo lili ilingacitika ukupitila mu mfwa NO kubuuka kwakwa Kristu ukufuma ku bafwa, te ku mfwa fye yakwe. Kristu ''aafwile pali ifwe'' umuku umo. Isambilisho lya kukabushanya kuti lyapilibula ukuti wene aali no kufwa pali cila muntu umo umo uwa muli ifwe.

Kristu nga aalipiile inkongole shesu no mulopa wakwe, ipusukilo lyesu lyasanguka icintu cimo ico ifwe twingenekela nge nsambu yesu. Icishinka cakuti ipusukilo ca bupe, ilyaleetelwe ku luse no kweelela kwakwa Lesa, kuti caluba mu menso ifwe nga twailuka ilambo lyakwa Kristu ngo kulipila inkongole. Cene kabili capanga ukuti Lesa umukali aatembeleshiwe ilyo Wene aamwene umulopa utuntulu uwakwa Yesu. Lelo cintu Lesa amona ilyo ifwe twalapila Mwana Wakwe ngo mwiminishi wesu, uyo ifwe tuletukuta ukupashanya, ukucila ifwe ukuisuntikanya fwebene ku mulopa wakwa Kristu ngo muti. Ishamalumbo ne nyimbo ishingi isha 'bena Kristu' shakwata ubwingi bwa kupapa ubwa masambilisho ya bufi mu cifulo ici. Isambilisho lya bufi ilyacilamo lipatikishiwa mu mano ya bantu pa kwimba, ukucila ukusambilisha kwa Baibele, ukwa mano. Ifwe tufwile lyonse ukuba abaibukila ku musango uyu uwa kulufya amano.

Icabusanso, amashiwi ayanaka ayakuti ''Kristu aafwile pali ifwe'' (Abena Roma 5:8) yalufyanishiwa apakalamba ngo kupilibula ukuti Kristu aafwile mucifulo ca ifwe. Kuli ukusuntikana ukwingi pakati ka Abena Roma 5 na 1 Abena Korinti 15 (pamo nga vesi 12 = 1 Abena Korinti 15:21; vesi 17 = 1 Abena Korinti 15:22). ''Kristu aafwile pali ifwe'' (Abena Roma 5:8) alinganishiwa kuli ''Kristu aafwile pa membu shesu'' (1 Abena Korinti 15:3). Imfwa yakwe yaali ya kupanga inshila umo ifwe twinganoonkela ukweelelwa kwa membu shesu; cene cali ni mu mano aya emo ''Kristu aafwile pali ifwe''. Ishiwi lyakuti ''pa'' nangu ''pali'' talipilibula fye ukuti 'mucifulo ca'; Kristu aafwile ''pa membu shesu'', te 'mucifulo ca' shiko. Pamulandu wa ici, Kristu kuti ''aacita ukupaapaata'' pali ifwe (Aba Hebere 7:25) - te 'mucifulo ca' ifwe. Kabili ishiwi ''pa'' talipilibula 'mucifulo ca' mu Aba Hebere 10:12 na Abena Galatia 1:4.