8.5 Ukwampana Kwakwa Lesa Na Yesu

Ukutontonkanya pafyo Lesa aabuushishe Yesu ukufuma ku bafwa kwatungulula ifwe ku kutontonkanya palwa kwampana pakati kakwa Lesa na Yesu. Bene nga bali ''babili abalingana...babili aba pee'', ngefyo isambilisho lya lesa patatu lilondolola, ninshi ifwe tuli no kwenekela ukwampana kwabo ukuba kulya ukwa balingana. Ifwe kale tumwene icishininkisho icakumanina ukuti umulandu uyu tauli ifyo. Ukwampana pakati kakwa Lesa na Kristu kuli ukwapalana na kulya ukuli pakati ka mulume no mukashi: ''Umutwe wa mwaume onse ni Kristu; no mutwe wa mwanakashi mwaume; no mutwe wakwa Kristu ni Lesa'' (1 Abena Korinti 11:3). Ngefyo umulume e mutwe wa mukashi, efyo Lesa e mutwe wakwa Kristu, nangu bene bakweete ukwikatana kumo kwine ukwa kuboomba ngefyo kulingile ukuba pakati ka mulume no mukashi. Eco ''Kristu wakwa Lesa'' (Abena Korinti 3:23), ngefyo umulume e mwine wa mukashi.

Lesa Tata ilingi alandwa ukuba Lesa wakwa Kristu. Icishinka cakuti Lesa alondololwa nga ''Lesa wakwa Shikulu wesu Yesu Kristu kabili Wishi'' (1 Petro 1:3; Abena Efese 1:17) nangu panuma fye ya kunina kwakwa Kristu ukuya ku mulu, calanga ukuti uku e kwampana kwabo nomba, ngefyo kwene kwali munshita ya mweo wakwa Kristu uwa mfwa. Cene limo limo cilondololwa na abena lesa patatu ukuti Kristu asoswa fye ngo kuba uwaceepako pali Lesa munshita ya mweo wakwe pa calo. Amakalata ya mu Cipingo Cipya yaalembelwe imyaka imo panuma Kristu alinina ukuya ku mulu, lelo nanomba Lesa asoswa nga Lesa wakwa Kristu kabili Wishi. Yesu nanomba acita Wishi nga Lesa wakwe.

Ukusokolola, ibuuku lyakupelekesha mu Cipingo Cipya, lyalembelwe ukucila imyaka 30 panuma ya kupeela ubukata kuli Kristu no kunina ukuya ku mulu, lelo lyene lisosa palwakwa Lesa nga ''Lesa wakwe kabili Wishi (wakwa Kristu)'' (Ukusokolola 1:6). Mwi buuku ili, Kristu uwabuushiwa ukufuma ku bafwa no kupeelwa ubukata aapeele imbila ku batetekela. Wene asosa palwa ''itempele lyakwa Lesa wandi...ishina lyakwa Lesa wandi...umusumba wakwa Lesa wandi'' (Ukusokolola 3:12). Ici cashininkisha ukuti Yesu nangu nomba atontonkanya palwakwa Wishi nga Lesa wakwe - kabili eico wene (Yesu) tali Lesa.

Munshita ya mweo wakwe uwa mfwa, Yesu aaloseshe kuli Wishi mu nshila iyapalana. Wene aasosele palwa kunina ukuya ku mulu ''kuli Tata, kabili Shinwe; na kuli Lesa wandi, kabili Lesa wenu'' (Yohane 20:17). Pa capindama, Yesu aalangile ubuntunse bwakwe umupwilapo: ''Lesa wandi, Lesa wandi, bushe mulandu nshi Imwe mwalekelesha ine?'' (Mateo 27:46). Amashiwi ya musango uyu tayengacitika ukwiluka nga yasoswa na Lesa Umwine. Icishinka fye cakuti Yesu aapepele kuli Lesa ''no kulila ukwa maka ne filamba'' icine ceka calangilila umusango wa cine uwa kwampana kwabo (Aba Hebere 5:7; Luka 6:12). Lesa mu kushininkisha tekuti apepe ku Mwine. Nangu nomba, Kristu apepa kuli Lesa pa lubali lwesu (Abena Roma 8:26,27 N.I.V. pashanya 2 Abena Korinti 3:18 R.V. amashiwi yakulondolola).

Ifwe nomba twalangilila ukuti ukwampana kwakwa Kristu na Lesa munshita ya mweo wakwe uwa mfwa takwaali mu cituntulu ukwapusana ukufuma kufyo kwene kuli nomba. Kristu aaloseshe kuli Lesa nga Wishi kabili nga Lesa wakwe, kabili aapepele kuli Wene; icifulo cimo cine efyo cili nanomba, panuma ya kubuuka kwakwa Kristu ukufuma ku bafwa no kunina ukuya ku mulu. Munshita ya mweo wakwe pa calo, Kristu aali mubomfi wakwa Lesa (Imilimo 3:13,26 N.I.V.; Esaya 42:1; 53:11). Umubomfi acita ukufwaya kwakwa shikulu wakwe, kabili mu nshila yonse tali uwalingana na shikulu wakwe (Yohane 13:16). Kristu aakoonkomeshe ukuti amaka ne nsambu fintu wene aakweete fyafumine kuli Lesa, ukucila mu nsambu yakwe umwine: ''Ine pa lwandi ne mwine tekuti ncite akantu nakalya...Ine mfwaya...ukufwaya kwakwa Tata uyo uwatuma ine...Umwana tekuti acite akantu pa lwakwe umwine nakalya'' (Yohane 5:30,19).