5.5 Millennium

Pa nshita iyi mwi sambililo lyesu lya mweo mu Bufumu, kabelenga uutontonkanya sana ali no kwipusha, 'Bushe icikope ici ica Bufumu bwakwa Lesa tacimoneka conse nge ca buntunse?' Abantu mu Bufumu bacili bakalafyala abana (Esaya 65:23) nangu fye no kulafwa (Esaya 65:20). Abantu aba bacili bakalakwata imilandu ya fikansa intu Kristu akalapwisha (Esaya 2:4), kabili bacili bakalakabila ukubomba pa mushili pa kwikala no mweo, nangu fye uku kukaba ukwanaka nganshi ukucila ino nshita. Fyonse ifi fyamoneka ngo musowa uli ukutali ukufuma ku filayo fyakuti abalungami bakapokelela umweo wa pee, no musango uwapala uwakwa Lesa, ukucitwa abalingana na bamalaika, abo abashuupa nangu ukufyala (Luka 20:35,36). Ubwasuko bwalaala mu cishinka cakuti iciputulwa cantanshi ica Bufumu bwakwa Lesa cikapwa imyaka 1,000 - e 'Millennium' (mona Ukusokolola 20:2-7). Mu nshita ya Millennium uyu kukaba amabumba ya bantu yabili pa calo:-

1 Abamushilo - abo muli ifwe abalekonka Kristu bwino bwino mu mweo uyu, abo abakapeelwa umweo wa pee pa cipuna ca bupingulo. Mona: 'uwamushilo' cilepilibula umuntu 'uwaitwa ukufumamo', kabili cilesonta kuli onse uwatetekela uwacine.

2 Abantu abakufwa, abalifye abashakeshibe Imbila nsuma pa nshita ya kubwela kwakwa Kristu - ekutiila bene tabakakume ku cipuna ca bupingulo.

Ilyo Kristu akeesa, abantu babili bakaba mu mpanga, umo akasendwa (ku bupingulo), na umbi akashala (Luka 17:36); abo ''abakashala'' bakaba mwi bumba lya cibili ili.

Panuma ya kupokelela umusango wakwa Lesa pa cipuna ca bupingulo, abamushilo tabakabe na maka ya kufwa nangu ukufyala abana. Eico ukulondololwa kwa bantu ukumona ifintu ifi mu Bufumu kufwile ukusonta kwi bumba lya cibili - abo abakaba no mweo pa nshita ya kubwela kwakwa Kristu, lelo abashaishiibe ififwaya Lesa. Icilambu ca balungami cili kuba ''imfumu na bashimapepo: kabili tukateeka pa calo'' (Ukusokolola 5:10). Imfumu shilakwata ukuteeka abantu; eico abantu abo abakaba abatuutu ku Mbila nsuma pa nshita ya kwisa kwa cibili bakashala abamweo, pakuti bateekwe. Ukupitila mukuba ''muli Kristu'' ifwe tukaakana icilambu Cakwe - ico icili ukuba imfumu ye sonde: ''Wene uwacimfya...kuli wene ine nkapeela amaka pamulu wa nko: na wene akateeka bene ne nkonto ya cela...ngefyo ine napokelele ukufuma kuli Tata'' (Ukusokolola 2:26,27).

Umulumbe wakwa Kristu uwa mondo nomba waponena mu cifulo - ababomfi abatetekela balilambwilwe ne mishi ikumi nangu isano ukuteeka pali yene mu Bufumu (Luka 19:12-19). Ukwishiba inshila shakwa Lesa takwakasalangane ilyo line fye Kristu akabilishiwa ukuba Imfumu mu Yerusalemu; abantu bakalaya ku Yerusalemu ku kusanga ukulundapo ukwishiba pali Lesa (Esaya 2:2,3). Ibukisha, kabili, ifyo ulupili lwakwa Daniele 2:35,44 (ukwimininako Ubufumu bwakwa Lesa) lwakumene panono panono pa calo. Eico wene ukaba e mulimo wa bamushilo ukusalanganya ukwishiba kwakwa Lesa no Bufumu Bwakwe.

Kunuma lintu Israele ali e bufumu bwakwa Lesa, umulimo wa bashimapepo wali kusambilisha ukwishiba kwakwa Lesa (Malaki 2:5-7). Pamulandu wa mulimo uyu bene babiikilwe mu mishi iyalekanalekana mu Israele monse. Mu kupampamikwa libili kwa Bufumu ukwa bukata ubwacilapo, abamushilo bakapyana umulimo wa bashimapepo (Ukusokolola 5:10).

Should Christ come today:

Nga Kristu aisa lelo:

1. Abafwa abakumineko bakabuushiwa elyo, pamo na bamweo abakumineko, bakatwalwa ku cipuna ca bupingulo.

2. Ababifi abakumineko bakakaandwa ku mfwa, na balungami bakapeelwa umweo wa pee. Ubupingulo kabili bukapeelwa pa nko ishikakaana Kristu.

3. Elyo abalungami bakateeka pa bantu abo abakaba no mweo, lelo abashakakume kuli Lesa; bene nge ''mfumu kabili bashimapepo'' (Ukusokolola 5:10) bakasambilisha Imbila nsuma kuli bene.

4. Ici cikapwa imyaka 1,000. Eico mu nshita iyi abantu bonse abakufwa bakomfwa Imbila nsuma no kuba abakuma kuli Lesa. Abantu aba bakeekala ne myeo iitali iyacilapo kabili iya nsansa.

5. Pa mpela ya Millennium kukaba ubusangu bwa kulwisha Kristu na bamushilo, ubo Lesa akapwisha (Ukusokolola 20:8,9).

6. Pa mpela ya myaka 1,000, abo bonse abakafwa mu nshita ilya bakabuushiwa no kupingulwa (Ukusokolola 20:5,11-15).

7. Ababifi mukati kabo bakonaulwa, na balungami bakakumbinkana na ifwe mu kukwata umweo wa pee.

Umulimo wakwa Lesa ne calo elyo ukapwililika. Cene cikeesushiwa na bantu abalungami, abashifwa. Ishina lyakwa Lesa 'Yahweh Elohim' (ilipilibula 'Wene uukasokololwa mwi bumba lya ba maka') elyo likafikilishiwa. Eico ulubembu, ne mfwa, tafyakamonwe libili pa calo nakalya; icilayo cakuti ulubuto lwa nsoka lukonaulwa umupwilapo pa kupumwa pa mutwe, elyo cikafikilishiwa mu kupwililika (Ukutendeka 3:15). Mu nshita ya Millennium, Kristu akateeka ''ukufika ilyo wene akabiika abalwani bonse pesamba lya makasa yakwe. Umulwani wa kupelekesha uyo ukonaulwa ni mfwa...Kabili ifintu fyonse fikanakila kuli wene (Lesa), elyo Umwana umwine pamo akanakila kuli wene (Lesa) uyo uwabiikile ifintu fyonse pesamba lyakwe, pakuti Lesa engaba onse muli fyonse'' (1 Abena Korinti 15:25-28).

Iyi ''e mpela, ilyo wene (Kristu) akalubwila ubufumu kuli Lesa, kabili Shifwe'' (1 Abena Korinti 15:24). Ifyo ifikakonkapo mu nshita iyi lintu Lesa akaba ''conse muli fyonse'' ifwe tatwaebwa; ico ifwe twaishiba cakuti ifwe tukakwata umweo wa pee, umusango wakwa Lesa, kabili ifwe tukeekala ku kupeela ubukata no kutemuna Lesa. Cene ca musamwe ukwipusha fimbi ifyo cikaba panuma ya Millennium.

Ukwishiba kwa ''imbila nsuma ya bufumu bwakwa Lesa'' kuli ukwacindama pe pusukilo lyakwa kabelenga onse wa mashiwi aya. Ifwe twapaapaata kuli iwe ukubelenga libili isambililo ili no kulolesha amashiwi ya Baibele ayalandilwepo.

Lesa alefwaya ifwe ukuba mu Bufumu Bwakwe. Ukubomba Kwakwe konse kwapekanishiwe ifwe ukukwatamo iciputulwa cituntulu, ukucila fye ukulangisha, amaka Yakwe ayakupanga. Ulubatisho lutukuminisha ku filayo ifikumine ku Bufumu ubu. Cene cili icakosa ukutetekela ukuti ulubatisho, ukukonkwapo ne myaka inono iyakufuuka mu kunakila ku cebo cakwa Lesa, kuti fyanonkela ifwe ukwingila mu nshita ilya iyabukata, iya pee. Nomba icitetekelo cesu mu kutemwa kwakwa Lesa ukwafulisha cifwile cibe icaiminina ndi. Bushe nangu kube ubwafya shani ubwa nshita inono, icine cine ifwe natukwata umulandu wa mano uwakukaana ubwite bwa Mbila nsuma?

''Nga Lesa ali na ifwe, ninani engaba umulwani wesu?'' (Abena Roma 8:31).

''Amacushi ya ino nshita tayalingile ukulinganishiwa ku bukata ubo ubukasokololwa muli ifwe'' (Abena Roma 8:18). ''Ukucula kwesu ukunono, ukuli fye kwa nshita inono, kubomba kuli ifwe ubukata ubwafina ubwa pee ubwacilisha'' (2 Abena Korinti 4:17).