5.1 Ukulondolola Ubufumu

Amasambililo ya kunuma yalanga ukuti kwene kupekanya kwakwa Lesa ukulambula umweo wa pee ku bantu Bakwe abatetekela pa kubwela kwakwa Kristu. Umweo wa pee uyu ukeekalwa pa calo; ifilayo fyakwa Lesa ifibwekeshiwapo ifikumine kuli uyu tafipilibula nangu panono ukuti abatetekela bakaya ku mulu. ''Imbila nsuma (ilyashi ilisuma) ya bufumu bwakwa lesa'' (Mateo 4:23) yabililwe kuli Abrahamu mu musango wa filayo fyakwa Lesa ifikumine ku mweo wa pee pa calo (Abena Galatia 3:8). Eico ''ubufumu bwakwa Lesa'' ni nshita panuma ya kubwela kwakwa Kristu ilyo ifilayo ifi fikafikilishiwa. Ilyo Lesa mu kutangilila e Mfumu ya fibumbwa Fyakwe fyonse nangu pali nomba, Wene alipeela umuntu ubuntungwa bwa mifwaile ku kuteeka isonde no mweo wakwe wine ngefyo wene alefwaya. Eco pa nshita ino isonde liswilemo ''ubufumu bwa bantu'' (Daniele 4:17).

Pa kubwela kwakwa Kristu, ''ubufumu bonse ubwe sonde ili (bukaba) bufumu bwakwa Shikulu wesu, na Kristu wakwe; na wene akateeka umuyayaya no muyayaya'' (Ukusokolola 11:15). Elyo ukufwaya no kukabila kwakwa Lesa fikacitwa mu calo ici mu kupwililika kabili apabuuta. Eco ifunde lyakwa Yesu kuli ifwe ukupepa: ''Ubufumu Bwenu bwise (ukuti) ukufwaya Kwenu kucitwe mu calo, ngefyo bwene buli (nomba) mu mulu'' (Mateo 6:10). Pamulandu wa ici, ''ubufumu bwakwa Lesa'' mashiwi ayabombela pamo na ''ubufumu bwa mu mulu'' (Mateo 13:11 pashanya Marko 4:11). Mona ukuti ifwe tatubelenga palwa 'ubufumu mu mulu'; bwene buli bufumu bwa mu mulu ubo ubukapampamikwa na Kristu pa calo pa kubwela kwakwe. Ngefyo ubufwayo bwakwa Lesa mu kupwililika bunakilwa na bamalaika mu mulu (Amalumbo 103:19-21), efyo bwene bukaba mu bufumu bwakwa Lesa kuntanshi, ilyo icalo cikeekalwamo fye na balungami, abo aba kaba ''abalingana na bamalaika'' (Luka 20:36).

Eico ukwingila mu bufumu bwakwa Lesa pa kubwela kwakwa Kristu e cikafuma mu kutulukusha kwesu konse ukwa Bwina Kristu mu mweo uyu (Mateo 25:34; Imilimo 14:22); ecalenga, cene cili icacindama ukukwata ukwiluka ukwalungama pali ubu. Ukubila kwakwa Filipi palwakwa ''Kristu'' kwalondololwa nga ukusambilisha ''ifintu ifikumine ku bufumu bwakwa Lesa ne shina lyakwa Yesu Kristu'' (Imilimo 8:5,12). Amashiwi na mashiwi yaleibukishako ifwe ifyo ''ubufumu bwakwa Lesa'' bwali e cisendo cikalamba ca kubila kwakwa Paulo (Imilimo 19:8; 20:25; 28:23,31). Eico cene cili icacindama nganshi ukuti ifwe twiluke bwino bwino isambilisho lya Bufumu bwakwa Lesa, pakumona ukuti bwene bwacita iciputulwa icacindama ica bukombe bwa Mbila nsuma. ''Ifwe tufwile ukwingila mu bufumu bwakwa Lesa ukupitila mu bucushi ubwingi'' (Imilimo 4:22); eico bwene e lubuuto pa mpela ya bwendo bwa mweo uyu, kabili e nkosho ku kucita amalambo yantu umweo wa cine wa Bwina Kristu ufwaya.

Nebukadnesa, imfumu ya Babiloni, alefwaya ukwishiba ifya kuntanshi mwi sonde, (mona Daniele 2). Wene apeelwe icimonwa ica mushiinku ukalamba, icapangilwe ne fyela ifyalekanalekana. Daniele ailwile umutwe wa golde ngo kwimininako imfumu ya Babiloni (Daniele 2:38). Panuma yaiko, kwali no kwisa ukukonkana kwa mabufumu mu ncende iyashinguluka Israele, ku kusondwelelwa no musango umuli ''ngefyo ifikondo fya makasa fyali lubali fya cela, na lubali ifye bumba, efyo ubufumu bukaba lubali ubwakosa, na lubali ubwatobeka'' (Daniele 2:42).

Ukulinganya kwa maka mwi sonde kuli ukwaakanishiwa pakati ka nko ishingi, shimo sha maka na shimo ishanaka. Daniele elyo amwene ilibwe ilinono lyauma icipasho pa makasa, ukoonaula cene, na lyene lyeka lyalaakula ukuba ulupili ulukalamba ulwaiswiile icalo conse (Daniele 2:34,35). Ilibwe lyaiminineko Yesu (Mateo 21:42; Imilimo 4:11; Abena Efese 2:20; 1 Petro 2:4-8). ''Ulupili'' ulo Wene akapanga ponse pa calo lwaimininako Ubufumu bwakwa Lesa ubwa muyayaya, ubo ubukapampamikwa pa kwisa kwakwe kwa cibili. Ubusesemo ubwine bweka buli cishininkisho icakuti ubufumu bukaba pa calo, te mu mulu.

Icakuti ubufumu bukapampamikwa mu kupwililika mu cituntulu pa kubwela kwakwa Kristu cili cikomo ca mashiwi yambi. Paulo asosa palwakwa Yesu ukupingula abali no mweo na bafwa ''pa kumoneka kwakwe no bufumu bwakwe'' (2 Timote 4:1). Mika 4:1 atoola amano yakwa Daniele ya bufumu bwakwa Lesa ukuba ngo lupili ulukalamba: ''Mu nshiku sha kupelekesha cene cikeesapita, icakuti ulupili lwa ng'anda yakwa Yehoba lukapampamikwa'', palya elyo pakonka ukulondolola kwa musango untu ubufumu ubu bukaba pa calo (Mika 4:1-4). Lesa akapeela Yesu icipuna ca bufumu cakwa Dabidi mu Yerusalemu: ''Wene akateeka...umuyayaya, na ku bufumu bwakwe takwakabe impela'' (Luka 1:32,33). Ici cafwaya ukubako kwa nshita imo apo Yesu ali no kutendekela ukuteeka pa cipuna ca bufumu cakwa Dabidi, no bufumu bwakwe ukutendeka. Ici cikaba pa kubwela kwakwa Kristu. ''Na ku bufumu bwakwe takwabe impela'' casuntikana na Daniele 2:44: ''Lesa wa mu mulu (aka) biikapo ubufumu ubushakonaulwe: (bwene) tabwakashiilwe ku bantu bambi''. Ukusokolola 11:15 kwabomfya insoselo iyapalana mu kulondolola ukuti pa kwisa kwa cibili, ''Ubufumu bonse ubwe sonde ili bwasanguka ubufumu bwakwa Shikulu wesu na Kristu wakwe; na wene akateeka umuyayaya no muyayaya''. Nakabili, kufwile ukuba inshita iyashininkishiwa ilyo ubufumu bwakwa Kristu no kuteeka Kwakwe fikatendeka pa calo; ici cikaba pa kubwela Kwakwe.