Ifishinte Fya Muli Baibele
Isambililo 7: Intulo Yakwa Yesu
Amasesemo Ya Cipingo Ca Kale palwakwa Yesu | Ukufyala Kwakwa Nacisungu | Icifulo Cakwa Kristu Mu Kupekanya Kwakwa Lesa | ''Mu Kutendeka Mwali Icebo'', Yohane 1:1-3. | Cakulundapo (Yesu Wa Kale, ''Ine Nafumine Ku Mulu'', Bushe Yesu Aapangile Icalo?, ''Intanshi Abrahamu taaliko, Ine Eko Ndi'' (Yohane 8:58), Melkisedeki) | Amepusho

Cakulundapo 26: Melkisedeki.

Abasambi ba Baibele abengi balanda 'Amene' icine cine ku mashiwi ya mutumwa Petro lintu aalembele: ''Munyinefwe uwatemwiikwa Paulo...mu makalata yakwe yonse...umo umuli ifintu fimo ifyakosa ukwilukwa, ifyo bene abo abashasambilila kabili abashateekanya bacitako ifikansa, ngefyo bene bacita pamo ku malembo yambi, ukuya ku boonaushi bwabo abene'' (2 Petro 3:15,16). Ici mu cishinka cakuma ku kulanda kwakwa Paulo pali Melkisedeki uko ukwalembwa muli Aba Hebere; wene umwine aasumiine ukuti wene aile mu kushika, ukusosa palwa fintu ifyo ifingakwaatwa fye ku batetekela abakalamba (Aba Hebere 5:10,11,14). Eico cene tacili icayana ukubiika isambilisho ilyacindama pa kusambilisha kwa mavesi ya musango uyu; nangu amashiwi palwakwa Melkisedeki tayalingile ukumoneka ayacindama mu mano ya abo abacili baleisa mu kusambilila amasambilisho ya ntanshi ya Malembo.

''Melkisedeki uyu, Imfumu ya Salemu (Yerusalemu), shimapepo wakwa Lesa wapulamo, uyo uwakumeenye Abrahamu alebwela ukufuma ku kwipaya imfumu, kabili aapaalile wene'' asoswa ngo uli ''uwabula wishi, uwabula nyina, uwabula ubufyashi (intulo ya kufyalwa), nangu ukukwata ukutendeka kwa nshiku, nangu impela ya mweo; lelo ukucitwa uwapalana no mwana wakwa Lesa'' (Aba Hebere 7:1,3). Ukufuma kuli ici cene cilandwa kuli bamo ukuti Yesu mu butuntulu eko aali intanshi ya kufyalwa kwakwe, kabili eico taakwete bafyashi ba buntunse.

Yesu alikwete Wishi (Lesa) na nyina (Maria) ne ntulo ya kufyalwa (mona Mateo 1, Luka 3 kabili pashanya Yohane 7:27). Eico 'Melkisedeki' tekuti asonte kuli wene umwine. Ukulundapo, Melkisedeki ''aacitilwe UWAPALANA no mwana wakwa Lesa'' (Aba Hebere 7:3); wene taali Yesu umwine, lelo aakwete ifyapalana fimo na wene ifyo ifileboomfiwa kuli kalemba pa mulimo wa kusambilisha. ''Panuma ya cipasho cakwa Melkisedeki kwaima shimapepo umbi'', Yesu (Aba Hebere 7:15), uyo uwasontelwe shimapepo ''panuma ya musango wakwa Melkisedeki'' (Aba Hebere 5:5,6).

Insoselo ya Aba Hebere pali Melkisedeki tekuti fye isendwe mu cituntulu. Melkisedeki nga mu cituntulu taakwete wishi nangu nyina, ninshi umuntu fye uyo wene engaba ni Lesa Umwine; Wene e muntu eka uwabula intendekelo (1 Timote 6:16; Amalumbo 90:2). Lelo ici cakaanwa na Aba Hebere 7:4: ''Tontonkanya ubukulu ifyo umuntu uyu aali'', na kabili ku cishinka cakuti wene aamwenwe ku bantu (ico Lesa tekuti cibe) kabili aapeele amalambo kuli Lesa. Wene nga aleitwa umuntu, ninshi wene afwile ukukwata abafyashi mu cituntulu. Eico ukuba kwakwe ''ukwabula wishi, ukwabula nyina, ukwabula ubufyashi'' kufwile ukusonta ku cishinka cakuti ubufyashi bwakwe na bafyashi bakwe tafyalembwa. Abafyashi bakwa Namfumu Estere tabaalembwa, kabili eico intulo yakwe yalondololwa mu nshila iyapalana. Mordekai ''aakushishe...Estere, umwana mwanakashi wakwa nalume: pantu wene taakwete wishi nangu nyina...untu Mordekai, ilyo wishi na nyina baafwile, aabulile ngo mwana wakwe umwanakashi'' (Estere 2:7).

Ibuuku lya Ukutendeka ilingi liya ukutali pa kulondolola intulo ya lupwa iya bantu bonse abo lyene lilanga kuli ifwe. Lelo Melkisedeki amoneka pa cifulo ukwabula ukulondololwa, ukwabula icalembwa ca bafyashi bakwe, kabili aaluba ukufuma mu lyashi mu kupulikisha ukwalingana. Lelo tekuti kube ukutwishika ukuti wene aali uwalinga umucinshi ukalamba nganshi; no mukalamba

Abrahamu aapeele ifyekumi kuli wene, no kupaalwa kuli wene, ukulanga bwino bwino ukucindama kwakwa Melkisedeki pamulu wakwa Abrahamu (Aba Hebere 7:2,7).

Paulo talecita fye ifyangalo fya matontonkanyo na Malembo. Kwali ubwafya ubutuntulu mu myaka ya mwanda wa ntanshi ubo ukulanshanya pali Melkisedeki kwali no kulungika. AbaYuda baalepeelulula:

'Imwe mwe Bena Kristu muleeba ifwe ukuti uyu Yesu kuti nomba aba shimapepo mukalamba wesu, ukupeela amapepo ne milimo yesu kuli Lesa. Lelo shimapepo ali no kukwata intulo ya kufyalwa iyaishibikwa, ukushininkisha ukuti wene afuma ku mutundu wakwa Lebi. Na munshila yonse, imwe mwebene mwasuminisha ukuti Yesu aafumine ku mutundu wakwa Yuda (Aba Hebere 7:14). Icabulanda, kuli ifwe Abrahamu e ntungulushi yesu ikalamba kabili icakumwenako (Yohane 8:33,39), kabili ifwe tatwakacindike uyu Yesu'.

Kuli ico Paulo aleyasuka:

'Lelo ibukisheni Melkisedeki. Icalembwa ca mu Ukutendeka capangwa pa kulanga ukuti shimapepo mukalamba wa musango uyu taakweete intulo ya kufyalwa nakalya; na Mesiya ali no kuba fyonse fibili imfumu na shimapepo, uyo bushimapepo bwakwe buli panuma ya musango wakwa Melkisedeki (Aba Hebere 5:6 pashanya Amalumbo 110:4). Abrahamu aali uwacepako kuli Melkisedeki, eico imwe mulingile ukwalula ishintililo lyenu ukufumya pali Abrahamu ukubiika pali Yesu, no kuleka ukwesha ukucita ilipusho palwa ntulo ya kufyalwa nge cacindama (mona 1 Timote 1:4). Imwe nga mwatontonkanya pafyo Melkisedeki acindama nganshi nge cipasho cakwa Yesu (ekutiila amashiwi ya mweo wakwe yaasontele kuntanshi kuli wene), ninshi imwe mukakwata ukwiluka kukalamba palwa mulimo wakwa Kristu'.

Na ifwe kuti twasenda isambililo lilya kuli fwebene.


  Back
Home
Next