Ifishinte Fya Muli Baibele
Isambililo 5: Ubufumu Bwakwa Lesa
Ukulondolola Ubufumu | Ubufumu Nomba Tabulapampamikwa | Ubufumu Bwakwa Lesa Mu Nshita Sha Kale | Ubufumu Bwakwa Lesa Kuntanshi | Millennium | Cakulundapo (Icituntulu Ca Bufumu, Ukwipifya Kwa Lyashi Lya Kale Lyakwa Israele) | Amepusho

5.4 Ubufumu Bwakwa Lesa Kuntanshi

Ifiputulwa 1 na 3 ifye Sambililo ili nafileta ilyashi ilingi ilyalinga pamulandu wa musango Ubufumu ubu bukaba. Ifwe natumona ukuti Abrahamu alilailwe ukuti ukupitila mu Lubuto lwakwe abantu ukufuma mu fiputulwa fye sonde lyonse bakapaalwa; Abena Roma 4:13 atanununa ici ukupilibula ukuti icalo conse cikekalwamo na bantu abo abali 'mu' Lubuto lwakwa Abrahamu, ekutiila Kristu. Ubusesemo bwa cimpashanya ubwakwa Daniele 2 bulondolola ifyo Kristu akeesa nge libwe linono, na panuma ubufumu bukatanunuka panono panono ukukumana isonde lyonse (pashanya Amalumbo 72:8). Ici capilibula ukuti Ubufumu bwakwa Lesa tabwakekale fye mu Yerusalemu nangu mu calo cakwa Israele, ngefyo bamo bashimika, nangu icine cine incende ishi shikaba e fifulo fya pakati.

Abo abakonka Kristu mu mweo uyu bakaba ''imfumu na bashimapepo; na ifwe tukateeka pa calo'' (Ukusokolola 5:10). Ifwe tukateeka pa mabumba ayalekanalekana ubukulu ne mpendwa; umo akateeka pa misumba ikumi, na umbi pa misumba isano (Luka 19:17). Kristu akaakana na ifwe ukuteeka kwakwe pa calo (Ukusokolola 2:27; 2 Timote 2:12). ''Imfumu (Yesu) akateeka mu bulungami, na bana ba mfumu (abatetekela) bakateeka mu bupingulo'' (Esaya 32:1; Amalumbo 45:16).

Kristu ali no kuteeka umuyayaya pa cipuna cakwa Dabidi ica bufumu ubukapampamikwa libili (Luka 1:32,33), ekutiila wene akakwata incende yakwa Dabidi ne cifulo ca kuteeka, ico cali mu Yerusalemu. Pakuti Kristu akateeka ukufuma mu Yerusalemu, uyu e ukaba musumba ukalamba wa Bufumu bwa kuntanshi. Mwene ni mu ncende iyi emo itempele likakuulwa (Esekiele 40-48). Ilyo abantu bakalalumbanya Lesa mu fifulo ifyalekanalekana isonde lyonse (Malaki 1:11), itempele ili likaba e pakati ka kupepa kwe sonde. Inko ''shikaya ukufuma ku mwaka no mwaka ku kupepa Imfumu, Yehoba wa milalo, kabili ku kusunga umutebeto wa nsakwe'' ukushinguluka itempele mu Yerusalemu (Sekaria 14:16).

Ulwendo ulu ulwa kuya ku Yerusalemu cila mwaka lwalisesemwa kabili muli Esaya 2:2,3: ''Mu nshiku sha kupelekesha, ulupili (ubufumu - Daniele 2:35,44) lwa ng'anda yakwa Yehoba (itempele) lukapampamikwa pa mulu wa mpili (ekutiila Ubufumu bwakwa Lesa ne tempele fikasansabikwa pamulu wa bufumu bwa bantu)...ne nko shonse shikapongolokela kuli lwene. Na bantu abengi bakaya no kulanda, Iseni imwe, no kuleka ifwe tuye ku lupili lwakwa Yehoba, ku ng'anda yakwa Lesa wakwa Yakobo; na wene akasambilisha ifwe palwa nshila shakwe...pantu mu Sioni mukafuma amafunde, ne cebo cakwa Yehoba ukufuma mu Yerusalemu''. Ici camoneka ukuba icikope ca nshiku shantanshi sha Bufumu, ilyo abantu bakasalanganya ukwishiba kwa kuteeka kwakwa Kristu kuli bambi, na bene bakaya ku ''lupili'' lwa Bufumu bwakwa Lesa, ubukalasalangana panono panono isonde lyonse. Ifwe pano twakwata icikope ca kupimpa kwine kwine mu kupepa kwa cintubwingi.

Cimo pa masanso yakalamba ya buntunse aya nshiku shesu cakuti abantu abengi 'bapepa' Lesa pamulandu wa miteekele, imiikalile, intambi nangu inkuntumutima, ukucila pa kushintilila kwa kwiluka kwa cine pali Wene nga Shibo kabili Kalenga. Mu Bufumu mukaba ukupimpa kwe sonde lyonse ukwa kusambilila inshila shakwa Lesa; abantu bakakoseleshiwa sana no kukabila uku icakuti bene bakeenda ukufuma monse mu mpela sha calo ukuya ku Yerusalemu ku kunonka ukulundapo ukwishiba Lesa.

Mu cifulo ca cimfulumfulu no kucishanya ifyacitilwe no muntu mu misango ya mafunde no butungulushi bwa bupingushi, kukaba umusango umo uwa mafunde konse konse - ''amafunde, ne cebo cakwa Yehoba '', ifyo ifikasoswa na Kristu ukufuma mu Yerusalemu. ''Inko shonse shikapongolokela'' ku nshita sha kusambilila ishi, ukulosha mukuti ukukabila uku ukwakusanga ukwishiba kwa cine kwakwa Lesa kukaceefya ukushenkana kwa cifyalilwa pakati ka nko, ngafintu cene cicitika pakati ka bantu abaipeela abene ku kunonka ukwishiba kwa musango uyu mu mweo uyu.

Ukulondolola uku ukwa nko shonse ukupongolokela ku Yerusalemu kuli ukwapalana ne cikope icilangilwe muli Esaya 60:5, uko abaYuda ''bakapongolokela capamo'' ukwendela pamo na Benafyalo (abashili baYuda) ku kupepa Lesa mu Yerusalemu. Ici casuntikana bwino bwino no busesemo bwakwa Sekaria 8:20-23 ubwa Bufumu:-

''Kukeesa abantu, na abekashi ba misumba iyingi; na abekashi ba musumba umo bakaya kuli umbi, ukulanda, Lekeni tutwalilile ukuya (ukulondolola kwa A.V. - pashanya Sekaria 14:16 'umwaka no mwaka') ku kupepa kuntanshi yakwa Yehoba, no kufwaya Yehoba wa milalo:

na ine ndeya. Ee, abantu abengi ne nko ishakosa bakeesa ku kufwaya Yehoba wa milalo mu Yerusalemu...abantu ikumi bakekata ukufuma mu ndimi shonse sha nko, no kwikata ku cakufwala ca wene uyo uli umuYuda, ukulanda, Ifwe tukaya na imwe: pantu ifwe natuumfwa ukuti Lesa ali na imwe''.

Ici calenga icikope ca bantu ba bwina Yuda ukucitwa ''umutwe, kabili te mucila'' wa nko, pamulandu wa kulapila no kunakila kwabo (Amalango 28:13); ukupekanya kwakwa Lesa ukwe pusukilo ilyashintilila pa baYuda elyo kukeshibikwa ku muntu onse. Ubutuutu bwa ici pakati ka bwina Kristu bwa nomba elyo bukapwa apo pene. Elyo abantu bakalanshanya ifintu ifi mu kucankwa, pakuti bene bengalanda ku baYuda, ''ifwe natuumfwa ukuti Lesa ali na imwe''. Elyo ukulanshanya kukashunguluka pa fintu fya bumupashi, ukucila ifyakwelenganya ifya bufi ifyaisula mu kutontonkanya kwe sonde ukulipo.

Pa kumona ukuipeela uku ukukalamba kuli bulesa, cene te cakupapa ukuti Kristu ''akapingula pakati ka nko...bene bakafula impanga shabo ukuba ifyakuliminako, na mafumo yabo ukuba ifyakutungwilako imiti: uluko talwakeemye ulupanga pa luko, nangu bene ukusambilila ubulwi nakabili'' (Esaya 2:4). Ubuteko bonse bwakwa Kristu no bupingushi bonse bwa kulamununa kwakwe mu fikansa fikamonekela mu nko ukupilibula mu kuitemenwa ifyanso fyabo ukuba ifibombelo fya bulimi, no kuleka ukusambilila konse ukwa bulwi. ''Mu nshiku shakwe abalungami bakabalula'' (Amalumbo 72:7) - ifya bumupashi elyo fikasansabikwa, no mucinshi ukapeelwa kuli abo abalangisha imisango yakwa Lesa iya kutemwa, uluse, ubupingushi na fimbi po. Pusanyako ici ku kusansabala kwa nomba ukwa baituumika, abayumfwa, na baitemwa.

Ukuitemenwa kwa kufula ''impanga ukuba ifyakuliminako'' kukaba ciputulwa ca kupilibuka kukalamba nganshi kwa bulimi uko ukukeesa pa calo. Pamulandu wa lubembu lwakwa Adamu, umushili walitiipilwe pamulandu wakwe (Ukutendeka 3:17-19), icalenga ukuti ukubomba sana pali nomba kulafwaikwa pa kukwata ifyakulya ukufuma muli wene. Mu Bufumu ''mukaba ing'ano ishalinga mu mushili pamulu wa mpili (ishali ishabula umufundo kale); ifisabo fyauko fikasunkana nga (ifisabo fya) Lebanoni'' (Amalumbo 72:16). ''Umuntu uleelima akatangilila uuleseepa, no ulekama imyangashi wene uulebyaala ulubuto; ne mpili shikaponya umwangashi uwalowa'' (Amose 9:13), umusango uyu e fikaba ukuwamishiwa kwa mufundo wa calo, no kuceefya kwa citiipu pa mushili icasoselwe mu Edeni.

Umulimo wa bulimi uwa musango uyu ukakwata abantu abengi. Amasesemo ya Bufumu yapeela ukwelenganya ukuti abantu bakabwelela ku musango wa mikalile ya bulimi, iya kuikalila:-

''Bene bakeekala cila muntu pesamba lya mwangashi wakwe na pesamba lya muti wa mukunyu wakwe; kabili nangu umo takalenge bene umwenso'' (Mika 4:4).

Ukuikalila uku kukacimfya ukucusha ukwaikala mu musango onse wa kwingisha abancito ya lupiya. Elyo ukwikala umweo onse mu kubomba ku kucita bambi abakankaala kukaba cintu ca kale.

''Bene bakakuula amayanda, no kwikala muli yene (abene beka); kabili bene bakalima amabala ya myangashi no kulya ifisabo fyaiko. Bene tabakakuule na umbi aikalamo; bene tabakalime na umbi alya...abasalwa bandi bakailemena umulimo wa minwe yabo pa nshita itali. Bene tabakabombele ibusha...'' (Esaya 65:21-23).

Esaya 35:1-7 akwata ubusesemo ubwacilamo ubwa ifyo umushili uwabulo mufundo ukapilibulwa, ukumonekela mu musango wa buseko ne nsansa mupepi ukufuma mu mushili, pamulandu wa nshila ya mweo iyanaka kabili iya bumupashi iya abo abakabomba pali wene: ''Amatololo...yakasansamuka...iciswebebe cikasekelela, no kubalula nge luba. Cene...cikasekelela no buseko no kwimba...pantu mu matololo mukalepuka amenshi, ne milonga mu ciswebebe. No mushili uwauma ukasanguka icishiba''. Nangu fye ubunkalwe pakati ka nama bukafumishiwapo: ''umumbulu no mwana wa mpanga fikaliila capamo'', na baice bakaba na maka ya kwangala ne nsoka (Esaya 65:25; 11:6-8).

Mu nshila imo ine ngefyo icitiipu icabiikilwe pa fibumbwa fya cifyalilwa cikaceefiwa apakalamba, efyo ico icabiikilwe pa muntunse cikaceefiwa pamo. Eco Ukusokolola 20:2,3 kwasosa mu nsoselo ya filangililo palwakwa kasebanya (ulubembu ne milimo ya luko) ''ukukakwa'', nangu ukuleshiwa, mu nshita ya Millennium. Ukwikala no mweo kukalundako, icakuti umuntu umo nga afwa ne myaka 100, wene akalapendwa ngo mwaice fye (Esaya 65:20). Abanakashi bakamona ubulanda bunono pa kufyala abana (Esaya 65:23). ''Elyo amenso ya mpofu yakeesulwa, na matwi yakwa nkomamatwi yakakomonwa. Elyo umuntu uwalemana akaciluka nge nsebula, no lulimi lwakwa cibuulu lukemba'' (Esaya 35:5,6). Ici cikaba pamulandu wa fyabupe fyacisungusho ifya Mupashi ukukwatwa libili (pashanya Aba Hebere 6:5).

Cene tekuti cikonkomeshiwe na maka ukuti Ubufumu bwakwa Lesa tabulingile ukumonwa ngo kutuusha kwa pa cishi ca pakabile bwino, kuntu abalungami bakailemena mu nshila iyapalana kuli iyo abantu bailemenamo ukonta akasuba mukati ka bukata bwa fyapangwa na Lesa. Ubukulu bwa mulimo wa Bufumu bwakwa Lesa buli bwa kupeela ubukata kuli Lesa, ukufika ilyo icalo cikeesula no bukata kuli Wene ''ngafintu amenshi yafimba pali bemba'' (Habakuki 2:14). Uku e kupekanya kwakwa Lesa ukwakulisha: ''Icine cine ngafintu ine naikala no mweo, icalo conse cikeesula no bukata bwakwa Yehoba'' (Impendwa 14:21). Ubukata kuli Lesa bulepilibula ukuti abekashi ba mu calo bakeshiba, ukutasha no kwambula imibeele Yakwe iyabulungami; pakuti isonde likaba mu musango uyu, Lesa akasuminisha icalo ca mushili ukulangisha ici, pamo. Eco ''abafuuka bakapyana icalo (mu Bufumu), no kuisansamusha abene mu bwingi bwa mutende (wa bumupashi)'' (Amalumbo 37:11), ukucila ukuilemena umweo uwayanguka. Abo ''abaleumfwa insala ne cilaka ca bulungami...bakeekuta'' na bwene mu Bufumu (Mateo 5:6).

Itontonkanyo fye lya kukwata umweo wa pee mu Bufumu ilingi libomfiwa nge 'cilyo' ca kusembeleka abantu ukutemwa ubwina Kristu. Lelo, ukukwata kwesu ukwa wene mu nshita ilya, mupepi kukaba ukushalingana no mulandu utuntulu untu ifwe tukabeela mu Bufumu - uyo uli wa kupeela ubukata kuli Lesa. Mu nshita yonse intu ingashala kuli ifwe panuma ya lubatisho lwesu, ukwishiba kwesu ukwa ici kulingile ukutwalilila ukukula.

Kuli kalemba wa ili ibuku, imyaka fye ikumi iyakwikala mu buseko bwa kupwililila kutunulu na kampingu musuma na Lesa kuti kwalingana no bwafya bonse ubwa mweo uyu. Icakuti umusango uyu uwa bukata ukeekala umuyayaya icine cine upeesha amano, ukusenda ifwe ukucisha pa mpela sha kwiluka kwa buntunse.

Nangu fye ilyo bwamonwa mu musango wa mubili panono, ukuba mu Bufumu bwakwa Lesa kulingile ukuba e kukoseleshiwa kwesu kukalamba ukwa kusuula ifisuma fye sonde no bunonshi. Mu cifulo cakutontonkanya sana pa fyakuntanshi ifili mupepi, Yesu apandile amano, ''Imwe intanshi fwayeni ubufumu bwakwa Lesa, no bulungami bwakwe; na fyonse ifintu ifi fikalundwako kuli imwe'' (Mateo 6:30-34). Icintu conse ico ifwe twingelenganya no kubombela tekuti cilingane ku kufikilisha kukalamba kwa kuba mu Bufumu bwakwa Lesa.

Ifwe tulekabila ukufwaya ''ubulungami (bwakwa Lesa)'', ekutiila ukwesha ukukuula ukutemwa kwa musango wakwa Lesa, icilepilibula ukuti ifwe tulefwaya ukuba mu Bufumu bwakwa Lesa pantu ubulungami bukalumbuka mulya, pantu ifwe tulefwaya ukuba abapwililila mu misango iyapwililika ukucila fye pantu ifwe, fwebene, tulefwaya ukufyuka imfwa no kwikala umweo uwanaka muli bu pee na pee.

Ilingi isubilo lya Imbila nsuma lipeelwa mu nshila ishakusekesha ukuitemwa kwa buntunse. Ukwabulo kutwishika ukukoseleshiwa kwesu kwa kuba mu Bufumu kulalekanalekana ukufuma ku bushiku no bushiku. Ico ifwe tulelanda pano cili cituntulu; icantanshi icikalamba cili kusambilila Imbila nsuma no kulanga ukunakila kwesu kuli yene mu lubatisho ukufuma mu kukoseleshiwa kwa kutemwa ukunakila kuli Lesa. Ukwishiba kwesu kwe subilo ilyo Lesa alepeela, ne milandu yesu iyalingana iyakufwaya ukuba mu Bufumu, fikakula no kufikapo panuma ya lubatisho lwesu.


  Back
Home
Next